Hasi berri den urteko guardiako farmazien egutegia etxez etxe banatuko du Azkoitiko Udalak aste honetan, herritarrek informazio hori eskuragarri izan dezaten. Gizarte Zerbitzuen ekimenez, hirugarren urtez banatuko dute guardiako farmazien eskuorria: "Normalean, adinekoak izaten dira farmaziara gehien joaten direnak, eta guztiak ez dira teknologia berrien
erabiltzaileak. Gaur egun, dena bilatzen dugu Interneten, baina kontuan izan behar dugu mundu guztiak ez duela sarerako sarbiderik hainbat arrazoirengatik. Horregatik, informazioa erabilgarria delakoan, pertsona guztiengana iristeko modua egin nahi dugu", esan du Janire Igoa Azkoitiko Udaleko Gizarte Zerbitzuetako zinegotziak.
Azkoitiko farmazien guardia-ordutegia honako hau da: astelehenetik ostiralera, 13:00etik 16:30era, eta igandeetan eta jaiegunetan, 11:00etatik 13:00etara.
