Azkoitiko anbulatorioko osasun langileek Osakidetza defenda dezagun. Stop inposizioari lelopean elkarretaratzea egin dute gaur, osteguna, anbulatorioan. LAB, SATSE, ELA, SME, CCOO eta UGT sindikatuek mobilizazio dinamikei ekin diote, negoziazioa eskatzeko eta osasun publikoa babesteko. eta gaur hainbat elkarretaratze egin dituzte ospitaleetan eta herriz herriko osasun zentroetan. Azkoitian, 13:00etan egin dute elkarretaratzea, eta hainbat herritarrek egin dute bat osasun langileen eskaerekin. EH Bilduko bi zinegotzi ere han izan dira.
Osakidetzaren "gobernu ereduari" eta "barne demokrazia sustatzeko premia larriari" buruzko hausnarketa egin behar direla uste dute sindikatuek. "Bertikaltasuna eta inposizioa Osakidetzako zuzendaritzan hasten dira, baina EAEko Osasun Zerbitzuaren egitura guztira hedatzen dira. Osakidetzaren demokratizazioak blokeoa gainditzea eta langileen ordezkariekin edukiak izango dituen benetako negoziazioa bultzatzea eskatzen du".