Zabaldu dute XLVIII. Kontzejupeko Pilota Txapelketarako izen-ematea. Oteiza pilota elkarteak antolatutako eskuz binakako pilota txapelketa herrikoian parte hartu nahi dutenek, urriaren 3, astelehena, baino lehen eman beharko dute izena Gurea pilotalekuan edo 667 50 39 18 telefonora whatsapp mezu bat bidalita.
Neska-mutilek Kontzejupean jokatuko dituzte partida guztiak. Benjamin —2013 eta 2014 urteen artean jaiotakoak—, alebin —2011 eta 2012 urteen artean jaiotakoak— eta infantil —2009 eta 2010 urteen artean jaiotakoak— mailetako haurrek eman ahalko dute izena txapelketan. Antolatzaileek adierazi dutenez, galtza zuriekin aritu beharko dute nahitaez pilotariek. Era berean, jakinarazi dute pilota goxoarekin jokatuko dituztela partida guztiak.
Partidak astelehenetik ostegunera bitartean jokatuko dituzte, baina beharrezkoa bada, baita asteburuetan ere. Antolatzaileek azaldu dutenez, ordea, partidak ez dituzte atzeratuko arrazoi garrantzitsurik ez badago tartean. Dena den, xehetasun gehiago jaso nahi duenak 667 50 39 18 telefonora deitu edo azkoitiotepilota@hotmail.com helbidera idatzi dezake.