Kike Amonarriz Euskaltzaleen Topaguneko presidentearen hitzaldiarekin amaitu da Gazte Geroak antolatutako aurtengo Udaberriko Hitzaldien zikloa. Atzo, osteguna, eskaini zuen tolosarrak solasaldia, eta Euskararen bidegurutzetik izenburupean, euskararen egoera izan zuen hizpide Elkargunean.
2019an hartu zuen Amonarrizek Topaguneko presidente kargua, eta urte hartan bertan idatzi zuen Euskararen bidegurutzetik liburua. Euskal filologian lizentziatua da tolosarra, eta umorista zein telebista aurkezle gisa ere aski ezaguna da.
Gazte Geroak antolatutako beste bi hitzaldiak Leyre Arrietak eta Izaskun Landaidak eskaini zituzten, eta hainbat herritar joan zen horiek entzutera.