Matadeixek 26 urte betetzen ditu aurten, eta urteurrena ospatzeko prestatu duten ekintza sorta gaur arratsaldean estreinatu dute, Porrotx eta Ekain pailazoen ikuskizunarekin. Sarrerak aurretik agortuta zeuden, eta Mataderi atariko arbolapean bero zakarretik babestuta itxoin dute gero barrua bete duten umeek eta haiekin joandako helduek, berandutu egin baita ikuskizunaren hasiera.
Itxaronaldiak itxaronaldi, pozik eta irribarrez hartu dituzte jarraitzaileek Porrotx eta Ekain, eta umeek zein helduek hartu dute gozatua bi pailazoen ateraldiekin eta abildadearekin.
26. urteurreneko egitarauaren hurrengo hitzordua ostiral honetarako jarri dute: 19:00etatik aurrera, ezkurra sukaldatzen ikasteko solasaldia eta dastaketa egingo dute, Asier Bastarrikarekin.