Eguraldi bikaina lagun, Santa Kutz auzoko jaiei jarraipena eman diete gaur, igandea, Laja jatetxean. Joan zen astean mus txapelketarekin hasi zen festa giroa auzoan, eta atzo, zapatua, afaria eta erromeria izan ziren Laja II.ak eta Lutxurdiok alaituta. Gaur, berriz, egun osoko egitaraua antolatu dute auzoan. Eguerdian, Jon Izagirre eta Beñat Landa trikitilariek musikaz alaitu dute giroa, eta, ondoren, poniak eta zezen txikiak izan dira haurrentzat zein gaztetxoentzat. Arratsaldean aurrera darrai festak, apar festarekin eta puzgarriekin.