San Andres Xake Txapelketaren XXVI. edizioak badu irabazlea: Juan Carlos Valor. Gaur, igandea, jokatu dute txapelketa Anaitasuna-Kakute xake taldearen egoitzan, eta zortzi partidatan 7,5 puntu erdietsita, lehen postuan gelditu da azkoitiarra. Bigarren postuan, berriz, Anibal Fernandez gelditu da, zazpi punturekin; Fernandezek zortzigarren partidan ezin izan du Valor mendean hartu, eta azken norgehiagoka horretan erabaki da garailea. Hirugarren postuan, berriz, Juan Manuel Navarro gelditu da, sei punturekin.
Gaurkoan, aforo murrizketarekin bada ere, aurrez aurre jokatu ahal izan dute San Andres Xake Txapelketa —iaz online egin zuten—, eta Angel Martin Azkoitiko Udaleko Kirol zinegotziak ohorezko sakea egin du lehen partidan, baita Anaitasuna-Kakute xake taldeko presidenteorde den Asier Plazaolak ere. Antolatzaileak "oso gustura" agertu dira txapelketarekin, Internet bidezko xake emankizunak "oso arrakastatsuak" izan direlako. Hori dela eta, datorren abenduaren 12an Gurea pilotalekuan egingo den Kutxa Fundazioaren Gaztedi txapelketaren finalean ere online eskainiko dituzte partidak.
(Argazkiak: Anaitasuna-Kakute xake taldea)