Kutxa Fundazioak xake jokalari gaztetxoentzat antolatzen duen Gaztedi txapelketaren aurtengo finala ere Azkoitian jokatuko da. Hala jakinarazi du Anaitasuna Kakute klubak. Azkoitiko klubak Kutxa Fundazioarekin eta Gipuzkoako Xake Federazioarekin elkarlanean antolatuko du finala; abenduaren 12an izango da, Gurea pilotalekuan.
Anaitasuna Kakutekoek gogoratu duten gisan, 2021aren barruan jokatuko den Gaztedi txapelketaren bigarren finala izango da abendukoa. Izan ere, joan den martxoan 2020ko edizioaren finala ere Gurean jokatu zuten. Orduan ez bezala, eta COVID-19aren pandemiaren bilakaeraren ondorioz, baldintza malguakoekin egin ahal izango dute finala. Martxokoan, esaterako, ateak itxita jokatu zuten gaztetxoen finala, eta streaming bidez eman zuten; abenduaren 12an, "gauzak aldatzen ez badira", egoera bestelakoa izango delakoan daude antolatzaileak, eta txapelketa normaltasunez egitea espero dute. "Ideia berriekin eta, batik bat, ilusioarekin ari gara lanean", adierazi dure Azkoitiko klubaren arduradunek.
Lehiari dagokionez, bi mailatan banatuta jokatuko da Gaztedi Xake Txapelketaren finala: Handiak mailan zortzi taldek hartuko dute parte, eta Txikiak mailan hamaseik.
San Andres Txapelketa
Gaztediren finala ez ezik, XXVI. San Andres Txapelketa ere ari da antolatzen Anaitasuna Kakute. Abenduko hitzordua ez bezala, iazkoaren antzeko formatuan egingo dute azaroaren 21ean 10:00etatik aurrera jokatuko den txapelketa hori. Horrela, gehienez 30 jokalarik izango dute parte hartzeko aukera, Kultur Etxean. Zazpi txandatan jokatuko dute txapelketa, bost minutuko partidekin.
2016tik 2019ra bitartean San Andres jaien bueltako txapelketarako erabili zuten formatu jendetsua berrartzeko pausoa 2022rako utzi du, horrenbestez, Anaitasuna Kakuteren zuzendaritzak. "Irail hasieran behin betiko erabakia hartu beharrean aurkitu ginen, aurreko lan eta erabaki asko eskatzen zuelako txapelketa jendetsua antolatzeak. Erabakia hartu genuen uneko egoera kontuan hartuta, aurreko urteetako formatua datorren urterako uztea onetsi genuen", azaldu dute arduradunek.