Kasu positiborik gabeko astea izan da Azkoitian

Andoni Elduaien 2021ko urr. 1a, 13:33

Intzidentzia tasa 100etik beherakoa da dagoeneko herrian; gainera, eremu berdera igarotzetik oso gertu kokatu da Azkoitia. Araba, Bizkai eta Gipuzkoako intzidentzia tasak, aldiz, bi puntu eskas egin du behera, eta eremu berdera igarotzetik hamar puntura geratu dira hiru lurraldeak.

Eusko Jaurlaritzako Osasun Sailak kaleratu berri dituen datuen arabera, atzo, osteguna, Azkoitian ez zuten kasu positibo bakar bat ere zenbatu. Hori horrela, herrian ez dute positiborik hauteman joan den ostiralaz geroztik; kasu positiborik gabeko astea izan da Azkoitian. Azken hamalau egunetako 100.000 biztanleko intzidentzia tasak ere kasu positiboen bide bera eman du azken egunetan herrian, eta gaur-gaurkoz, 83,45ekoa da zenbatekoa; eremu horitik berdera igarotzeko puntu gutxi behar ditu Azkoitiak. 

Urola Kosta eskualdean ere kasuak nabarmen joan dira jaisten azken egunetan. Herenegun bezala, atzo ere Azpeitian bakarrik baieztatu dituzte kasu positiboak eskualdean. Han, hiru kasu positiboren berri eman du Osasun Sailak, baina, intzidentzia tasak behera egin du; 170,83koa da egun tasa Azpeitia, eta eremu horian jarraituko du. 

Eskualdeko gainerako herrietan, beraz, ez dute kasu positiborik atzeman. Era berean, intzidentzia tasek behera egin dute edo herenegungo zenbateko berean mantendu dira. Hala, modu honetan daude gaur-gaurkoz eskualdeko herrien intzidentzia tasak: Aian, 503,78; Aizarnazabalen, Beizaman eta Errezilen zero; Getarian, 35,34; Orion 32,62 –eremu berdean–; Zarautzen, 85,66 –eremu horian–; Zestoan, 102,72; eta Zumaian, 61,06 –eremu horian–.

ZIUak, egonkor

Pandemia nabarmen ari da moteltzen, eta horren adibide da, atzo Hego Euskal Herriko lau lurraldeetan 50 kasu positibo baino gutxiago zenbatu izana. Guztira, 137 kasu positibo baieztatu zituzten Osasun Sailak eta Osasunbideak; hamar Araban, 50 Bizkaian, 43 Gipuzkoan eta 32 Nafarroan. Halere, lau lurralde horietatik kanpo bizi diren bi lagunek ere eman zuten positibo. Hegoaldean 6.889 PCR eta antigeno test egin zituzten, eta %1,9koa izan zen positibotasun tasa; hau da, proba egin zuten ehun lagunetatik ia bik eman zuten positibo.

Ospitaleetan ere ZIUn dauden gaixoen kopurua bere horretan mantendu da Araban, Bizkaian eta Gipuzkoan; egun, 37 lagun daude larri gaixorik. Osakidetzaren mendeko erietxeetan atzo 27 herritar ospitaleratu zituzten, eta gaur 95 dira ospitaleratuta daudenak. Nafarroan, aldiz, 35 lagun daude ospitaleratuta, eta zortzi ZIUn. Araba, Bizkai eta Gipuzkoako intzidentzia tasa 70,83an kokatu da gaur, eremu horitik berdera igarotzetik hamar puntura.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide