Azken hiru egunetan sei positibo hauteman ditu Osasun Sailak Azkoitian

Anartz Izagirre 2021ko eka. 14a, 13:09

Aurreko asteko asteburuan atzemandako positiboen erdiak baino gutxiago zenbatu dituzte azken asteburuan Azkoitian. Araba, Bizkai eta Gipuzkoako intzidentzia tasa, bestalde, 155,70ekoa da egun, eta Jaurlaritzak neurrien aldaketak egiteko ezinbestekoa zen 150eko zenbatekotik gertu kokatu da.

Eusko Jaurlaritzaren Osasun Sailak argitaratu ditu ostiraletik igandera bitartean Azkoitian izandako positiboen emaitzak, eta joan zen asteburuarekin alderatuta, nabarmen egin dute behera kasuek. Joan den astelehenean hamabost positiboren berri eman zuen Osasun Sailak, eta gaur sei kasu berri atzeman dituztela jakinarazi du.

Azken hamalau eguneko 100.00 biztanleko kasu metatuen tasak edo intzidentzia tasak azken egunotako zenbakietan jarraitzen du. Une honetan eremu gorrian dagoen eskualdeko eta Gipuzkoako herri bakarra da Azkoitia, eta gaur-gaurkoz 484,02koa da 100.000 biztanleko azken hamalau egunetako intzidentzia tasa.

Azkoitiko sei kasuez gain, Urola Kosta eskualdean beste zortzi positibo hauteman dituzte. Zumaian lau kasu zenbatu dituzte azken hiru egunetan –ostiralean hiru eta atzo bat–, eta ostiraletik hona zertxobait igo da intzidentzia tasa, 244,23tik 274,75era; halere, eremu horian jarraitzen du. Bestalde, Azpeitian hiru kasu hauteman dituzte, positibo bana egun bakoitzean, eta hainbat asteren ostean eremu laranjatik horira igaro da; gaur-gaurkoz, 256,24koa da tasa. Horrez gain, Orion kasu bat atzeman zuten larunbatean, eta intzidentzia tasa 244,62ra jaitsi da ostiraletik –260,93koa zen ostiralean–.

Gainontzeko eskualdeko herrietan ez dute kasu bat bera ere hauteman, eta behera egin dute edo mantendu egin dira herri horietako intzidentzia tasak. Zarautzen, esaterako, 132,78koa da intzidentzia tasa, eta ostiralean 145,91koa zen. Honakoak dira beste herrietako intzidentzia tasak: Aian 50,38 –ostiraleko bera–, Aizarnazabalen 260,08 –ostiraleko bera–, Beizaman hutsa, Errezilen 161,03 –ostiraleko bera–, Getarian 141,34 –176,68 zen ostiralean– eta Zestoan 25,68 –54,36 zen ostiralean–.

Ospitaleetan presio gutxiago

Hego Euskal Herrian ere norabide egokia hartu du positiboen bilakaerak. Atzo, igandea, 5.582 PCR eta antigeno proba egin zituzten lau lurraldeetan, eta horietatik 148 kasu izan ziren positiboak. Positibo gehien Bizkaian atzeman zituzten (54), eta ondoren, Gipuzkoan (47), Nafarroan (23) eta Araban (22). Positibotasun tasa, berriz, %2,6 da Araban, Bizkaian eta Gipuzkoan, eta %3 Nafarroan.

Ospitaleratzeen presioa ere nabarmen ari da arintzen Hego Euskal Herri osoan. Araban, Bizkaian eta Gipuzkoan, guztira, 157 pertsona daude ospitaleratuta eta horietatik 60 dira ZIUetan daudenak. Nafarroan, berriz, 32 dira ospitaleetan dauden eriak, eta horietatik 11 dira ZIUetan daudenak. Araba, Bizkai eta Gipuzkoako intzidentzia tasa, bestalde, 155,70ekoa da egun.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide