93 kasu positibo zenbatu dituzte Gipuzkoan

Mailo Oiarzabal 2021ko mai. 30a, 13:39

Bezperan baino PCR eta antigeno proba gutxiago eginda, bere horretan (%5,1) mantentzen da positiboen ehunekoa Araban, Bizkaian eta Gipuzkoan, eta gora egin du (%4,7) Nafarroan. COVID-19arekin lotutako ospitaleratze berrien kopurua jaitsi egin da Osakidetzaren sarean ostiraletik larunbatera, baita ZIUetan dauden gaixoen kopurua ere.

Azken egunen ildotik, COVID-19aren eraginaren arintzeak makal segitzen du Hego Euskal Herrian. Bezperan baino positibo gutxiago zenbatu zituzten atzo, larunbata, Osakidetzak zein Osasunbideak, baina birusa atzemateko egindako PCR eta antigeno probak ere gutxiago izan ziren atzo: 7.219 atzo, eta 9.775 ostiralean.

Guztira 363 kasu positibo azaleratu ziren atzo Hego Euskal Herrian: 47 Araban, 165 Bizkaian, 93 Gipuzkoan, 57 Nafarroan, eta lau lurraldeetatik kanpo bizi direnen artean beste bat. Positiboen ehunekoari dagokionez, bere horretan mantentzen da Araban, Bizkaian eta Gipuzkoan (%5,1), baina gora egin du Nafarroan (%4,7an dago orain, eta %3,8an zegoen atzo).

COVID-19arekin lotutako ospitaleratze berrien kopurua jaitsi egin da Osakidetzaren sarean ostiraletik larunbatera, baita ZIUetan dauden gaixoen kopurua ere. Atzo 27 pertsona ospitaleratu zituzten (herenegun 33 izan ziren), eta 99 gaixo zeuden ZIUetan (herenegun bi gehiago).

Eusko Jaurlaritzaren Osasun Sailak bihar emango ditu herriz herriko asteburuko positiboen datuak.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide