Azken lau egunetan lau kasu positibo zenbatuta, gora egin du intzidentzia tasak Azkoitian

Dorleta Agiriano Lai 2021ko mar. 22a, 13:20

Gutxi bada ere, Azkoitiko intzidentzia tasak gora egin du azken egunetan. Hego Euskal Herrian 1.781 kasu positibo hauteman dituzte azken lau egunetan.

Eusko Jaurlaritzako Osasun Sailak gaur jakinarazi du zenbat kasu positibo baieztatu dituzten udalerri bakoitzean aurreko ostegunetik atzora bitartean. Azkoitian lau positibo zenbatu dituzte azkeneko lau egunetan; kasu bana osteguneko, ostiraleko, larunbateko eta atzoko probetan. Ostegunean argitara ateratako emaitzekin 83,45ekoa zen intzidentzia tasa herrian, baina zenbatekoak gora egin du azken lau egunetan erregistratutako datuekin, eta 100,14koa da une honetan.

Urola Kosta eskualdean, berriz, guztira 31 emaitza positibo izan dira ostegunetik igandera bitartean egindako PCR eta antigeno probetan. Oraingoan ere Zarautzen atzeman dituzte positibo gehien, hain zuzen, hemeretzi –seina kasu osteguneko eta ostiraleko probetan, hiru larunbatekoetan eta lau atzokoetan–. 100.000 biztanleko hamalau eguneko tasak gora egiten jarraitzen du Zarautzen, eta 282,69koa da gaur-gaurkoz –herrikako azkeneko datuekin, asteazkenekoekin, 239,86koa zen tasa–.

Azpeitian, bestalde, hiru emaitza positibo izan dira ostegunetik atzora bitartean; bana ostegunean, ostiralean eta larunbatean, eta bat bera ere ez atzo. Kasu metatuen tasa 151,12koa da orain Azpeitian, eta Zarautzek eta Azkoitiak bezala, eremu horian jarraitzen du. Horiz margotuta dago Orio ere, hiru kasu baieztatu baitituzte azken lau egunetan –bana osteguneko, larunbateko eta atzoko probetan–, eta 146,77koa da intzidentzia tasa. Dena den, behera egin du tasak azken emaitzekin: 163,08koa zen aurreko asteazkeneko datuekin, eta 146,77koa da gaur egun.

Zestoan eta Zumaian kasu bana detektatu dute azken lau egunetan, larunbatean egindako probetan biak. Aian, Aizarnazabalen, Beizaman, Errezilen eta Getarian, ordea, ez da emaitza positiborik izan ostegunetik atzora bitartean.

1.781 kasu lau egunetan

Hego Euskal Herrian 395 kasu positibo detektatu zituzten atzo egindako probetan; 166 Bizkaian, 104 Gipuzkoan, 66 Nafarroan, 58 Araban eta bat beste lurralde batean bizi diren pertsonen artean. Positibotasun tasa gorantz doa Nafarroan eta %5,7koa izan da azken orduetan; Araban, Bizkaian eta Gipuzkoan, aldiz, %4,2koa izan da atzoko probetan –herenegun %4,6koa izan zen–.

Ostegunetik igandera bitartean, orotara, 1.781 emaitza positibo izan dira Hego Euskal herrian.

Araban, Bizkaian eta Gipuzkoan 228 pertsona daude Osakidetzaren erietxeetan ospitaleratuta, eta horietatik 90 daude ZIUn. Atzo 31 lagun ospitaleratu zituzten COVID-19ak jota. Oinarrizko birsorkuntza tasa edo R0 indizea, bestalde, 1,05ekoa da gaur-gaurkoz.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide