Gustura gelditu dira Euskal Herriko Trikitixa Elkartekoak XXXI. San Jose Trikiti Jaialdiaren emaitzarekin. Pandemiak eragindako egoerara moldatuta antolatu dute trikiti jaialdiaren aurtengo edizioa ere, eta horregatik bi emanaldi egin zituzten atzo, larunbata, Azpeitiko Soreasu antzokian.
Bi saioetan parte hartu zuten trikitilarien artean izan ziren Mailu Sudupe Egurrola eta Araitz Etxaniz azkoitiarrak. Egurrolak Lurdes Alkorta bikotekide zuela jardun zuen panderoarekin eta Araitz Etxanizek Eleia Diez herniarrarekin osatu zuen bikotea. Jaialdiko gainontzeko partaideak honakoak izan ziren:Alaitz Roteta (Zarautz) eta Ainara Saizar (Aia), Irma Carrera (Tolosa) eta Amets Arteaga (Baliarrain), Fa&Go taldea, Lidia Irigoien (Errezil) eta Leire Astiasaran (Zizurkil) nahiz Xabi Solana, Kristina Solano eta Txus Aranburu (Hernani).
Aurtengo edizioan Euskal Herriko Trikitixa Elkarteak gogora ekarri du orain dela 50 urte Mailu Sudupe Egurrolak Euskal Herriko Trikiti Txapelketan parte hartu izana. Jaialdian aipatu zuten, gainera, txapelketa nagusian parte hartu zuen lehen emakumea izan zela.
"Lantalde gisa oso gustura gelditu gara aurtengo trikiti jaialdiarekin. Izan ere, kontuan izan behar da horrelako jaialdiak antolatzeko oraindik egoera ez dela hain erraza", azaldu du Euskal Herriko Trikitixa Elkarteak.
Argazkiak: Ibon Errazu Uria.