Mugakide diren udalerrien artean mugitzeko aukera baimendu du Labi aholku batzordeak

Egun indarrean dagoen murrizketen dekretua mantendu egingo da, baina aldaketa batzuk erantsi dizkiote: mugakide diren udalerrien arteko mugikortasuna baimendu dute jarduera sozio-ekonomikoetarako eta aire libreko kirolak egiteko. Astelehenean sartuko dira indarrean neurri horiek.

Gaur, ostirala, goizean bildu da Labi aholku batzordea, Araban, Bizkaian eta Gipuzkoan COVID-19aren pandemia kontrolatzeko neurriak hartzen dituen batzordea. Atzo Labiren batzorde teknikoak egindako txostena oinarri hartuta, egun indarrean dauden neurrien inguruko erabakiak hartu dituzte gaur, eta bileraren ostean, horiek jakinarazi ditu Iñigo Urkullu Eusko Jaurlaritzako lehendakariak.

Hain zuzen ere, aldaketak egingo dituzte egun indarrean dagoen dekretuaren gainean, mugakide diren udalerrien artean mugikortasuna baimentzeko. Dena den, jarduera sozio-ekonomikoak egiteko eta aire zabalean kirola egiteko baimenduko dute mugakide diren udalerrien arteko mugikortasuna. Azkoitiak mugakide dituen udalerriak honako hauek dira: Azpeitia, Elgoibar, Mendaro, Zumarraga, Deba, Soraluze, Antzuola eta Bergara.

Egun indarrean dagoen udalerrien arteko itxiera perimetrala mantendu egingo dute, baina, hala ere, aukera izango da udalerrien artean mugitzeko honako kasu hauetan: lehiaketa profesionalean edo erdi-profesionalean aritzen diren taldeen entrenamenduetarako eta lehiaketetarako. Gainera, eremu gorrian ez dauden udalerrien kasuan, haien arteko joan-etorriak baimenduta egongo dira federatutako kirolarien lehiaketetarako eta entrenamenduetarako, eskola kiroleko entrenamenduetarako zein gimnasioetako, kirol klubetako edotan kiroldegietako ikastaro edo jardueretan parte hartzeko.

Egungo dekretuaren gainean egindako aldaketa horiek indarrean datorren astelehenean (otsailak 15) sartuko dira indarrean, Urkulluk zehaztu duenez. Gainera, moldaketa horiek eginda, baina egungo dekretua beste hogei egunetan indarrean mantentzea aurreikusi dutela esan du Urkulluk. Labi aholku batzordea datorren martxoaren 5ean bilduko da berriro, "izurritearen bilakaerak lehenago biltzea eskatuko ez balu".

EAEko Auzitegi Nagusiak eremu gorrian dauden udalerrietan ostalaritza irekitzearen alde emandako ebazpenaren kontrako helegiterik ez dutela aurkeztuko ere azaldu du Urkulluk, Labi aholku batzordearen bilkuraren ondoren egindako agerraldian.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide