Urtzi Azkue: "Abesti guztiak 'groove' erakoak dira, dantzagarriak eta alaiak"

Musikaren munduan ibilbide luzea du Urtzi Azkue (Leioa, Bizkaia, 1977) Azkoitiko bizilagunak, baina horrek ez dio nekerik eragin; kontrakoa. UR taldea sortu berri du David Gorospe zarauztarrarekin eta Andre Canto e Mello brasildarrarekin batera, eta dagoeneko kaleratu dute bederatzi abestiz osatutako lehen lan luzea: Baleak. Taldearen webgunean eta Bandcamp plataforman jarri dute entzungai eta doan eskuratzeko moduan. Proiektu berriaren nondik norakoak azaldu dizkio Maxixatzeni.  

Musika munduan ez zara berria, baina proposamen berri batekin zatoz: UR musika taldea eta Baleak lehen lan luzea. Nola jaio da UR?

Konfinamendu garaian jaio zen. Sortzeko beharra sentitu nuen eta terapia moduan ere balio izan zidan. Etxean estudio txiki bat daukat eta hantxe hasi nintzen ideiak grabatzen.

Denborapasa gisa hasi zinen ala proiektu berri bat abiarazteko asmoarekin?

Gogoa neukan ukitu elektronikoak dituen funkya egiteko, sintetizagailuekin-eta esperimentatzeko, eta horretan hasi nintzen, proiektu berri bat martxan jartzeko asmoarekin.

Azkoitiar bat, zarauztar bat eta brasildar bat elkartu zarete taldean. Nolatan?

Duela zenbait urte lagun batzuk Funk You! taldea sortu genuen Donostialdean-eta beste funky taldeen bertsioak jotzeko, eta orduan ezagutu nuen Andre. Brasildarra da bera, baina Donostian bizi da duela hamabost bat urtetik. Baxua jotzen du eta talde hartan elkarrekin jo genuen. Taldeko nukleoa hiru lagunek osatzen genuen, baina gero musikari ugari pasatzen ziren taldetik, eta tartean David bateria jotzaile zarauztarra ere pasatu zen. Nik aurretik ere ezagutzen nuen, baina esan daiteke orduan sortu zela hiruron arteko kimika. Proiektu berrirako nori deitu pentsatzen hasi nintzenean biekin gogoratu nintzen, eta deitzea erabaki nuen. Pare bat entsegu egin genituen eta ikusi genuen oso ondo funtzionatzen genuela elkarrekin.

Bakarrik hasi zinen kantuak sortzen, bai musika eta bai hitzak. Beste taldekideek zer ekarpen egin diote proiektuari?

Hasieran neuk egin nituen lau bat kantu, eta gero, hirukotea osatu genuenean, beste biei pasatu nizkien kantu haiek beren ekarpenak egin eta berregiteko. Handik aurrera egin ditugun kantuetan nik jarri dut hasierako ideia, baina gero hiruron artean osatu ditugu. Davidek lokalean eta nik etxean estudioak dauzkagu eta COVID-19aren garaiotan horrek asko errazten dizkigu gauzak.
 
Hemen horren ohikoa ez den musika estilo bat jorratzen duzue: funkya; eta hortik abiatuta beste hainbat musika estilo. Nolatan?

Musikan hasi nintzenetik gaur arteko bidean estilo ugari jorratu ditut, metala ere bai garai batean, baina azken urteetan funkyaren bueltan nabil gehienbat. Bidean gitarra irakasle ugari izan ditut, bakoitza estilo batekoa: izan nuen heavy bat, jazza jotzen zuen bat, funkya egiten zuen beste bat… Horrek neu ere aberastu egin nau, estilo diferenteak probatzeko bidea eman dit, eta denetan erakargarrienak jazz eta funky estiloak egiten zaizkit.  

Urtzi Azkue (gitarra eta ahotsa), David Gorospe (bateria) eta Andre Canto e Mello (baxua).

Azken hilabeteetan pare bat single aurkeztu dituzue aurrerapen gisa, baina orain prest duzue zuen lehen lan luzea: 'Baleak'. Zergatik 'Baleak'?

Taldeak UR izena duenez, polita iruditu zitzaigun diskoari Baleak jartzea. 

Entzuleek zer topatuko dute lehen disko horretan?

Entzuleek denetik topatuko dute diskoan. Abesti guztiak groove erakoak dira, dantzagarriak eta alaiak. Azkenean denak dira akorde batzuetatik abiatuta egindako kantuak, baina bakoitza bere makilajearekin edo apaingarriekin. 

Noiz argitaratu zenuten diskoa eta zer moduzko harrera izaten ari da?

Duela pare bat aste jarri genuen disko osoa entzungai eta pozik gaude izan duen harrerarekin. Gustura entzuten dela esan digute, hainbat estilotako abestiak egoteak entzuteko erraza egiten dutela, eta kanta bakoitzak duela bere zera. 

Abesti batzuk ingelesez daude eta beste batzuk euskaraz. Zergatik?

Aurreko diskoetan dena ingelesez egin izan dut eta disko berrian ere letra gehienak ingelesez daude, estilo honetako musika gehienbat ingelesez entzuten dudalako eta hitzak hala ateratzen zaizkidalako. Esan beharra daukat neure burua gehiago dudala musikaritzat, letristatzat baino. Hitzak egiten ditut, baina hitzak egitea musika egitea baino askoz gehiago kostatzen zait, eta normalean bilatzen dudana da letra musikalak egitea. Dena den, aurreko diskoetan ez bezala, oraingoan ahalegina egin dut euskara erabiltzeko. Lehenengo urratsa eman dut eta nik uste aurrerantzean kantu berri gehienak euskaraz etorriko direla.

Diskoak eta taldeak zer bide egitea nahiko zenuke?

Orain hirukotea gara, baina aurki teklatuak joko dituen beste lagun bat batuko zaigu taldera kontzertuetarako-eta, eta orain momentuan nahi duguna da eta gure helburua da ahalik eta gehien jotzea. Kantuak sortzea gustatzen zaigu eta horretan ere ondo pasatzen dugu, baina sortu dugun hori erakustea da gehien betetzen gaituena. Zuzenekoetan aurrean duzun jendearekin sortzen den kimika hori sekulakoa da; ez dago hitzez azaltzerik. 

Egoera ez dago kontzertuak emateko moduan. Aukerarik izan al duzue?

Oraindik ez. Ari gara aukera batzuk aztertzen, eta luze baino lehen eman nahiko genuke gure estraineko kontzertua, baina herriak itxita dauden bitartean ez da erraza izango. 

Musika dantzagarria egiten duzuela esan duzu, baina azkenaldian publikoa eserita egon ohi da kontzertu gehienetan. Nola moldatuko zarete?

Berez gure musika gehiago da zutik eta eskuan tragoa duzula entzutekoa, baina egoera zein den kontuan izanda kantuei laguntzeko irudiak prestatzen ari gara antzokietarako eta.

Taldearen webgunean doan deskargatzeko moduan jarri duzue diskoa.

Hala da, bai. Nahi duguna da gure musika ahalik eta gehien zabaltzea, hortik etorriko zaigulako kontzertuak emateko aukera, eta horretarako, gure musika ahalik eta eskuragarrien jartzea erabaki dugu.

Taldearen webgunean ez ezik Bandcamp plataformako zuen kanalean ere jarri duzue diskoa entzungai, eta hor, gainera, donazioak ere onartzen dituzue. Zertarako?

Aparteko helbururik gabe. Gure musika edonoren eskura eta doan jarri dugu, baina norbaiti iruditzen bazaio lanak merezi duela eta zerbait eman nahi duela, hor badu aukera.

Diskoa euskarri fisikoan ateratzeko asmorik ba al duzue?

Ari gara ideia horri buelta batzuk ematen, baino orain momentuan ez diogu zentzu handirik topatzen. Ikusten badugu kontzertu dezente emateko aukera sortzen zaigula, agian aurrerago aterako dugu taldearen materiala kontzertuetan saltzeko. 

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide