Bi kasu berrirekin, eremu laranjan jarraitzen du Azkoitiak

100.000 biztanleko hamalau eguneko tasa metatua 375,53 da gaur-gaurkoz Azkoitian. Bestalde, Hego Euskal Herrian mila kasutik gora zenbatu dituzte.

Eusko Jaurlaritzaren Osasun Sailak adierazi duenez, bi kasu berri hauteman zituzten atzo, asteartea, Azkoitian, eta eremu laranjan jarraitzen du 100.000 biztanleko hamalau eguneko 375,53ko intzidentzia tasarekin. Azken egunetan datu berrien kopurua egonkortu egin da herrian; hau da, datuek ez dute ez gora ez behera egin. 

Eskualdeko beste herri batzuetan, ordea, egoera okerragoa da. Izan ere, albiste ezin txarragoa jaso dute azpeitiarrek San Sebastian egunean. Azpeitia eremu gorrira itzuli da atzo beste 21 positibo detektatu ondoren. 100.000 biztanleko azken hamalau eguneko kasu metatuen tasa 538,76ra igo da, eta, ondorioz, 500eko langa igarota, semaforo gorria piztu da herrian. Ostalaritzako establezimenduek ateak itxi beharko dituzte ostiraletik aurrera, herria eremu laranjara itzuli arte.

5.000 biztanletik gorako hiru herri daude gaur egun eremu gorrian eskualdean: Zumaia, Orio eta Azpeitia. Zumaian beste lau positibo detektatu zituzten atzo, eta gutxi bada ere intzidentzia tasa jaitsi da: azken egunotan 926an zegoen tasa, eta atzo 783,56an. Oraindik 500eko langa hori urrun ikusten da, baina beherako joera mantentzea garrantzitsua da. 

Orion ere beste lau kasu izan zituzten atzo, eta kasu metatuen tasak gorantz egin du: 636ko tasa zuten herenegun, eta 668,62koa atzo. Astelehenetik itxita dago Orio, eta gorriz dauden beste herrietan bezala, 500eko langa horretatik jaitsi arte itxita jarraituko du. 

Guztira 41 kasu izan ziren atzo eskualdean. Aipatutakoez gain, launa kasu izan ziren Zarautzen eta Zestoan. Azken herri hau 500eko langatik hurbil dago gaur egun; atzo 436,57ko intzidentzia tasa zuen. Azkoitian bezala, Aizarnazabalen ere bina kasu izan zituzten, eta ez zuten atzo positiborik izan Aian, Beizaman, Errezilen eta Getarian.

Mila kasutik gora Hego Euskal Herrian

Hego Euskal Herrian beste 1.246 kasu izan ziren atzo. Araban, Bizkaian eta Gipuzkoan 13.774 proba egin zituzten, eta 1.046k eman zuten positibo. Hiru lurraldetako positibotasun tasa %7,6koa zen atzo. Araban 110 positibo izan zituzten, 616 Bizkaian, 298 Gipuzkoan, eta hemendik kanpoko beste 22 pertsonak ere positibo eman zuten. 

Osakidetzak emandako datuen arabera, atzo beste 97 lagun ospitaleratu zituzten COVID-19ak eragindako gaixotasunekin. ZIUn, aldiz, 83 lagun zeuden atzo, bezperan baino bat gehiago.

Nafarroan, aldiz, zertxobait egin dute behera kasu positiboek. Atzo 200 kasu izan zituzten egindako 3.226 probetan. Bezperan baino 39 kasu gutxiago dira. Positibotasun tasa %6,2koa zuten atzo Nafarroan. Osasunbidek ez du eman ospitaleratuen daturik.

 

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide