Joan den ostiralean, Azkoitiko hainbat gurasok 'Pupitre isolatua' ekimena egin zuten herrian. Herriko plaza nagusiaren erdian eskolako mahai bat jarri zuten lau aulkiz inguratuta, "haurrek eskoletan duten egoera gogorra" isladatzeko asmoz. COVID-19 egoera dela eta eskoletan ezarri dituzten "neurri murriztaileengatik" agertu dira kexu gurasoak, eta kontingentzia plana berrikusteko mezua zabaldu nahi izan zuten herritarren aurrean.
Haurrekin hartu diren hainbat neurriren aurrean, "ezintasuna" sentitzen dutela azaldu dute ekimena bultzatu duten gurasoek. "Neurriok eragin dezaketen kaltea, mesedea baino handiagoa izan daiteke. Izan ere, neurri batzuk ezartzea erabakitzen denean horien proportzionaltasuna ondo ikertu behar da, eta konziente izan ondorio kaltegarriak izan ditzaketela haurtzaro eta gizarte osoarengan. Babestu ditzagun gure haurrak, mindu gabe", azaldu dute gurasoek.