Garai zailak bizi dituzte ostalariek eta haien hornitzaileek, eta haserre daude. Joan den astean, SOS ostalaritza lelopean, bizi duten egoera salatzeko eta Eusko Jaurlaritzari eta udalari laguntzak eskatzeko auto karabana egin zuten Azpeitiko ostalari eta hornitzaileek. Eta biharko deitu duten mobilizazioan Azkoitiko ostalariak ere parte hartuko dute, Azpeitiko plazan jarri dute hitzordua 12:00etan, eta handik abiatuko dira auto karabanan Azkoitia aldera.
Haserrea agertzeaz gain, laguntza eskatzeko mobilizatuko dira bihar; izan ere, ostalaritza guneetako langileentzat "ezinbestekoa" da erakundeen laguntza. "Eusko Jaurlaritzari dirulaguntzak indartzeko eta udalei zergak ez ordainarazteko" eskatuko die ostalariek eta hornitzaileek.
Protestan jarraitzeko asmoa
Biharko mobilizazioa Azpeitiko ostalariek deitutako hirugarrena eta Azkoitikoek parte hartuko duten lehendabizikoa izango da, baina deitzaileek aurreratu dutenez, "egoerak horrela jarraitzen badu" aurrera begira protestan jarraitzeko asmoa dute, eta ez dute baztertu haserre kanpaina abiaraztea ondoko herrietako ostalariekin batera. Dena den, oraindik ez dute ezer zehatzik erabaki.