Bulego musika taldeak Ilun dagoen arren EP berria aurkeztu zuen atzo, asteartea, Baztartxo antzokian. Bi emanaldi eskaini zituen herriko musika taldeak; 16:00etan hasi zen lehen saioa, eta 18:30ean bigarrena. Biak ala bietan Baztartxo bete egin zen egun dituen edukiera mugetara. Iñigo Aranbarri aktore azkoitiarrak aurkeztu eta zuzendu zituen bi emanaldiak, eta umorez Bulegoren eta taldea osatzen duten bost musikarien hainbat gai ukitu zituen.
Aurkezpenaz gain, taldeak bideoen bidez erakutsi zituen diskoa sortzeko bidean grabatutako irudiak. Umoretik aparte, sentimenduzko uneak ere izan ziren antzokian. Gainera, Paula Diaz abeslari azkoitiarrak Tomas Lizarazu musika taldeko abeslariarekin batera kantatu zuen abesti bat. Amaieran, ikus-entzuleek musika taldeko kideei taldearen inguruan galderak egiteko aukera ere izan zuten.