Astelehenean hasi ziren ospatzen Azkoitiko San Jose egoitzan Adinduen Astea, eta igandera bitartean hainbat ekintza egingo dituzte. Aurtengoa, baina, ez da beste urteetakoa bezalako astea izango, aurrez aurreko bisitarik ez baitute jasoko egoiliarrek.
Atzo, asteartea, Bizkargi Musika Eskolako ikasleen emanaldiaz gozatzeko aukera izan zuten egoiliarrek arratsaldean. Hori bai, bizi dugun egoera tarteko, aurrez aurreko ekitaldia izan ordez, grabatuta bidali zuten ikuskizuna eskolako ikasleek.
Astean zehar, zine forum saioak, txokolatadak eta bingoak izango dituzte egoitzan, eta igandean, astea agurtzeko, meza, bazkari berezia eta opari banaketa egingo dituzte.
