Martxan da dagoeneko Errigoraren udazkeneko kanpaina. Hain zuzen ere, herritarrek azaroaren 12ra arte izango dute Nafarroako hegoaldeko produktuz osatutako saskiak eskatzeko aukera –Internet bidez edo herriko hainbat gunetan–. Gainera, bazkideen artean zozkatzeko bi otarre eder eskaini dizkio Maxixatzeni, eta bazkideek astelehena bitartean izango dute zozketan parte hartzeko aukera.
Kaxa berde eta beltz bana zozkatuko ditu Maxixatzenek bazkideen artean. Kaxa berdea honako jaki hauez dago osatuta: txitxirioak, ardo ozpina, oliba olio birjina estra, barazki menestra, pasta, orburuak, pikillo piperrak, arroza, zainzuri zuriak, botila ardoa, udare zukua eta Seaskaren egutegia. Kaxa beltzak, berriz, honako osagai hauek ditu: orburuak, pikillo marmelada, pikillo piperrak, zainzuri zuriak, teilak, tomate frijitua, mertxika almibarretan, oliba olio birjina estra, kardua, mahats zukua, botila ardoa, piper mamia eta Korrikaren katilua.
Zozketan parte hartu nahi duten Maxixatzeneko bazkideek maxixatzen@maxixatzen.eus helbidera idatzi beharko dute mezua, Errigora saskia izenburuarekin. Mezuan bazkidearen izen-abizenak, helbidea eta telefono zenbakia zehaztu beharko dira.