Gol bana sartuta, 1-1 emaitzarekin, bukatu zen atzo Anaitasunak eta Sodupek elkarren aurka jokatutako neurketa. Espainiako Hirugarren Mailako denboraldi berria estreinatu zuten atzo Txerloian izan zen norgehiagokan. 17:00etan hasi zen Anaitasunako gizonen talde nagusiaren partida, eta 297 ikusle joan ziren norgehiagoka ikustera.
Lehen zati ona egin zuten gorrixek, eta 1-0 emaitzarekin iritsi ziren atsedenera, 24. minutuan Anderrek sartutako golari esker. Bigarren zatian, ordea, Sodupekoek gola sartu zuten Anaitasunakoen atean, eta bana berdinduta gelditu ziren. Hortik aurrera, jokoaren erritmoa asko jaitsi zen eta gol aukera gutxi izan zituzten bi taldeek. 71. minutuan bigarren txartel horia atera zion epaileak Xabier Azkoitiari, eta hura joko zelaitik kanporatu egin zuen. Ondorioz, partidaren azken zatia jokalari bat gutxiagorekin jokatu zuten gorrixek.