23 kasu positibo zenbatu ditu Osasun Sailak herrian

Gaur 1.200 herritarrek egingo dute PCR proba.

Egun bakar batean herrian atzemandako kasu positibo kopuru handiena da atzokoa. Dena den, Osakidetzak ez du jakinarazi zer ordutara arteko PCR probak hartu dituen kontuan kopurua jakinarazterakoan. Herriko intzidentzia tasa 700,64koa da azken kasuak baieztatu ondoren. Hego Euskal Herrian kasuek gora egin dute berriz ere. 

Osasun Sailak egun bakar batean herrian atzemandako kasu positibo kopuru handiena atzo detektatu zuen. Izan ere, atzo hasi ziren 17 eta 60 urte arteko herritarrei PCR probak egiten, eta 23 lagunek eman dute positibo. Dena den, Osakidetzak ez du zehaztu atzoko zer ordutara arteko datuak diren kaleratu dituenak. Hala eta guztiz, atzo atzemandako 23 kasuek laukoiztu egin dute herenegungo positibo kopurua.

Era berean, 100.000 biztanleko hamalau eguneko tasa ere jakinarazi du Osasun Sailak, eta Azkoitikoa 700,64koa da gaur-gaukoz. 46 lagunek eman dute positibo herrian urria hasi zenetik, eta lehen kasua Azkoitian agertu zenez geroztik, dagoeneko 240 kasu baieztatu dituzte. 

Osasun Sailak, halaber, aurrerantzean I(D)/I(D-7) intzidentzia tasaren arrazoia zenbatekoa den jakinaraziko duela esan du. I(D)/I(D-7) intzidentzia tasaren arrazoia 1,04koa da Azkoitian. Tasa horrek gaurko txostenean eman duten hamalau eguneko intzidentzia metatuaren tasa konparatzen du duela astebete emandako tasa berarekin. Tasa horren balioa puntu bat baino txikiagoa bada, intzidentzia tasak behera egin nahi duela esan nahi du. Azkoitian, ordea, puntu baten gainetik dago une honetan tasa.

Azkoitiko 23 kasuez gain, beste hamazortzi kasu zenbatu ditu Osasun Sailak eskualdean. Kasu horiek guztietatik hamabi hauteman dituzte Azpeitian, bi Zumaian eta bana zenbatu dute Errezilen, Getarian, Orion nahiz Zestoan. Gainerako herrietan ez dute kasu berririk atzeman.

Kasuak gora, Hego Euskal Herrian

Hego Euskal Herrian 854 kasu positibo atzeman zituzten atzo. 10.314 PCR proba egin zituen Osasun Sailak Araban, Bizkaian eta Gipuzkoan, eta 454 kasu positibo baieztatu zituen, hau da %4,4. Bizkaian eta Gipuzkoan antzeko datuak jaso dituzte, izan ere Bizkaian 195 kasu zenbatu dituzte eta 192 Gipuzkoan. Araban, aldiz, 58 pertsonari detektatu diote positiboa. Horiez gain, lurralde horietatik kanpo bizi diren beste bederatzi laguni atzeman diote positiboa.

Arabako, Bizkaiko eta Gipuzkoako erietxeen egoeraren berri ere eman du Osasun Sailak. 238 pertsona daude hiru lurralde horietan ospitaleratuta; atzo, 29 pertsona gehiago ospitaleratu zituzten. Egun, 48 lagun daude Zainketa Intentsiboen Unitatean (ZIU). Oinarrizko birsorkuntza tasa edo R0 indizea 1,01ekoa da. 

Nafarroan, bestalde, 400 kasu positibo hauteman ditu Nafarroako Osasun Institutuak. 3.236 PCR proba egin zituzten atzo Nafarroan, eta ondorioz, proba egin zutenen %12,4ak eman du positibo. Ospitaleei dagokionez, 251 pertsona daude Nafarroako erietxeetan ospitaleratuta, horietatik 26 ZIUn. Lau heriotza gehiagoren berri ere eman du Nafarroako Gobernuak.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide