Azken PCR probetan ez dute kasu positibo berririk detektatu Azkoitian

Araban, Bizkaian eta Gipuzkoan guztira 8.519 PCR proba egin zituen atzo Osakidetzak, eta guztira 314 kasu positibo berri zenbatu zituen. Aurrerantzean, azkoitiarrek Azkoitian bertan egin ahalko dituzte PCR probak, astelehenetik ostiralera bitartean.

Azken hiru egunetan Osasun Sailak Azkoitian hamazazpi kasu zenbatu baditu ere, atzo, astelehena, egindako PCR probetan Osakidetzak ez du kasu positibo berririk zenbatu herrian. Hala eta guztiz ere, 100.000 biztanleko zazpi eguneko tasa 367,00koa da Osasun Sailak emandako datuen arabera. Azkoitian lehen kasua agertu zenez geroztik 144 azkoitiarrek eman dute positibo. Gainera, Azkoitiko Udalak gaur jakinarazi du urriaren 1etik aurrera herritarrek Azkoitian bertan egin ahal izango dituztela PCR probak, astelehenetik ostiralera bitartean.

Eskualdean, ostera, bederatzi pertsonak eman dute positibo atzo Osakidetzak egindako PCR probetan. Asteburuko datuekin alderatuta, behera egin dute kasuek, ostiraletik igandera bitartean 34, 39 eta hamazazpi kasu zenbatu baitzituen Osakidetzak, hurrenez hurren. Herriz herri aztertuta, aldiz, Zarautzen atzeman ditu Osasun Sailak kasu gehien: bost guztira. Horrez gain, Aian bi kasu hauteman ditu Osakidetzak eta bana Orion eta Zumaian. Eskualdeko gainerako herrietan ez dute kasu berririk zenbatu.

Araba, Bizkai eta Gipuzkoako datuak ere eman ditu Eusko Jaurlaritzak. Atzo 8.519 PCR proba egin zituen Osasun Sailak hiru lurralde horietan, eta guztira 314 kasu positibo hauteman zituen; hau da, proba egin zutenen %3,6k eman du positibo. Lurraldeka aztertuta, berriz, Bizkaian zenbatu dituzte beste behin kasu positibo gehien: 167 kasu guztira. Gipuzkoan, aldiz, 87 kasu detekatu ditu Osakidetzak eta 52 kasu Araban. Horrez gain, hiru lurralde horietatik kanpo bizi diren zortzi laguni ere positiboa detektatu diete.

Araba, Bizkai eta Gipuzkoako ospitaleetan 286 pertsona daude gaur gaurkoz ospitaleratuta, horietatik 55 Zainketa Intentsiboen Unitatean (ZIU). Atzo beste 33 lagun ospitaleratu behar izan zituzten hiru lurraldeetan, Osasun Sailaren arabera COVID-19 gaitzaren sintomekin. Oinarrizko birsorkuntza tasa edo RO indizea, aldiz, 0,98koa da Araba, Bizkai eta Gipuzkoako datuak batuta.

Nafarroan, aldiz, 348 kasu positibo zenbatu zituen Osasunbideak atzo egindako PCR probetan. 3.346 proba egin zituzten atzo lurralde horretan; orain arte egindako proba kopururik handiena da hori, gainera. Ospitaleen egoerari buruzko informazioa ere eman du Nafarroako Gobernuak, eta jakinarazi du 206 pertsona daudela Nafarroan ospitaleratuta, atzo baino bat gutxiago. Hala eta guztiz ere, 25 lagun daude ZIUn. Hildakoak ere izan ziren atzo Nafarroan: bost guztira.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide