Bihar amaituko da Maxixatzenen udako argazki lehiaketa

Azken txanpara iristen ari da Maxixatzenen udako argazki lehiaketa. Izan ere, bihar, hilak 15, jasoko ditu Maxixatzenek azken argazkiak, eta ondoren, hainbat sari banatuko ditu parte-hartzaileen artean, hala nola epaimahaiaren saria, Maxixatzen.eus-eko erabiltzaileen saria eta botoa ematen duten herritarren artean banatuko den saria.

Urolako Komunikazio Taldeak, eta tartean Maxixatzenek, udako argazki lehiaketa antolatu du aurten lehen aldiz, eta azken txanpara iritsi da dagoeneko irudiak bidaltzeko epea; izan ere, bihar, hilak 15, izango da argazkiak bidaltzeko azken eguna. Maxixatzenek izendatutako epaimahaiak erabakiko du zein den aurtengo lehiaketako argazkirik onena. Ondoren zabalduko da herritarrek argazki onenaren aldeko boza emateko epea, webgune honetan garatuta dagoen lehiaketa sistemaren bidez.

Sari bikainak eskuratu ahal izango dira aurtengoan. Epaimahaiaren saria jasotzen duen argazkiaren egileak, esaterako, Otarre jatetxean otordua irabaziko du. Maxixatzen.eus-eko erabiltzaileen boto gehien jasotzen dituen irudiaren egileak, berriz, argazki inprimaketa irabaziko du Hizki papertegiaren bitartez. Eta botoa ematen duten herritar guztien artean Maxixatzen aldizkariaren eta Urola Kostako Hitza egunkariaren harpidetza lortuko du.

Ezaugarriak

Uda sasoian ateratako argazkiak jasoko ditu Maxixatzenek, eta ondoren jarriko du martxan lehiaketaren fasea. Horrenbestez, herritarrek bihar izango dute argazkiak aurkezteko azken eguna, azkoitia@ukt.eus helbidera e-posta mezua bidalita edo Whatsapp bidez 688 84 63 51 telefono zenbakira idatzita. Parte-hartzaile bakoitzak, gehienez, hiru argazki aurkeztu ahal izango ditu lehiaketara.

Irudiak Whatsappez bidaltzen dituztenek 'MAX' eta argazkiaren izenburua zehaztu beharko dituzte. Whatsapp edo e-posta mezuetan, berriz, argazkia non egina den azaldu eta hainbat datu pertsonal eman beharko dituzte herritarrek, hala nola izen-abizenak, helbidea, herria, adina, NA, e-posta helbidea eta telefono zenbakia.

Azkoitiarrek edo Azkoitiko bizilagunek bidali ahal izango dituzte argazkiak lehiaketara, eta koloretako nahiz zuri-beltzeko irudiak aurkeztu ahal izango dituzte. Argazkiek, baina, inon argitaratu gabekoak izan beharko dute.

Argazkia guztiak Urolako Komunikazio Taldearen artxiboan gordeko dira, eta hedabide taldeak bere egiteko du jasotako lanak publikatzeko eskubidea. Bidalitako lanen jabe den lehiaketako parte-hartzaileak lanak erabiltzen eta jendaurrean erreproduzitzen uzten dio Urolako Komunikazio Taldeari, egilearen izena adierazita.

Lege oharra

Datu Pertsonalak Babesteko Araudia betez, jakinarazi nahi dizugu zure datu pertsonalak Urolako Komunikazio Taldea, Koop. E. enpresaren tratamendu-sistemetan jasoko direla, lehiaketa hau kudeatzeko eta eskualdeko hedabide desberdinen eskaintzen berri emateko. Era berean, lehiaketan parte hartzen duten argazkiak webgune eta kanal desberdinetan hedatuak izango dira. Sariduna gertatuz gero, zure identifikazio-datuak argitaratuak izango dira, baita saria modu egokian kudeatzeko beharrezkoak izan daitezken kolaboratzaile zuzenei komunikatuak ere. Zure datuak babesteko eskubideak noiznahi erabil ditzakezu. Horretarako, idatzi bat bidali beharko duzu Soreasu z/g - 20730 Azpeitia helbidera edo admnistrazioa@ukt.eus helbide elektronikora. Zure datu pertsonalen babesari buruzko informazio zehatzagoa urolakosta.hitza.eus/hitzakide/pribatutasun-politika/ web orrian aurki dezakezu.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide