1.027 kasu berri zenbatu dituzte azken orduetan Hego Euskal Herrian

Osasun krisia hasi zenetik, Hego Euskal Herrian izan den kopururik altuena da azken orduetakoa. Asteburua izanik, Eusko Jaurlaritzako Osasun Sailak ez du herriz herriko daturik eman.

Koronabirus kasuek oraindik ere ez dute goia jo Hego Euskal Herrian; izan ere, azken 24 orduetan 1.027 kasu berri zenbatu dituzte lau lurralde horietan, orain arteko zifrarik altuena —herengun ere kasu kopuru berbera zenbatu zuten—. Eusko Jaurlaritzako Osasun Sailaren arabera, Bizkaian izan dira kasu gehien, 539; Gipuzkoan, berriz, 210 kasu hauteman dituzte, eta Araban, 112. Horrez gain, hiru lurralde horietatik kanpo bizi diren bost pertsonak eman dute positibo PCR probetan. Nafarroako Osasun Publikorako Institutuak ere datu kezkagarriak helarazi ditu, 161 kasu berri izan baitira lurralde horretan azken orduetan.

Hego Euskal Herrian, guztira, 12.035 PCR proba egin zituzten atzo; Araban, Bizkaian eta Gipuzkoan 10.004, eta Nafarroan, 2.031. Bestalde, koronabirusagatik 53 pertsona ospitaleratu zituzten lau lurralde horietako erietxeetan. Asteburua izanik, Osakidetzak ez du herriz herriko daturik eman, eta astelehenean jakinaraziko dute ostiraletik igandera bitartean herriz herri zenbat kasu berri izan diren.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide