Mahai bueltan

Isidro Etxaniz: "Lana da hainbeste lagunentzat paella prestatzea, baina ez egitea ere pena da"

Andoni Elduaien 2020ko abu. 18a, 09:00
Isidro Etxaniz.

Andramaixetako herri bazkarirako paella prestatzen duen kideetako bat da Isidro Etxaniz (Azkoitia, 1964). Herrian egiten diren ekintzetan laguntzen aritzen da sarri, lan hori "gustukoa" duelako. Sukaldean egitea ere, oro har atsegin du. Aurten, COVID-19a tarteko ez dira ospatuko andramaixek, eta ondorioz, ez dute paella egin beharrik izango. Aurreko urtetako andramaixetan, abuztuaren 18an, 1.500 lagunentzako paella nola prestatu izan duten azaldu du azkoitiarrak.

Noiz eta zergatik hasi zinen andramaixetako herri bazkarirako paella prestatzen?

Atsegin nuen herri bazkarirako paella prestatzen zutenean sortzen zen giroa, han egoten nintzen nola egiten zuten begira. Garai hartan, besteak beste, Manduek, Pelotasek eta Etxezak jarduten zuten paella prestatzen. Haiek eginkizun hori uztea erabaki zutenean guk hartu genuen lekukoa. Haien bitartez hasi nintzen paella prestatzen, eta gustura aritzen naiz. Bederatzi urteedo izango dira zeregin horretan hasi nintzela.

Aurten ez da izango paellarik, ordea. Pena ematen al dizu?

Bai, noski. Lana da hainbeste lagunentzat paella prestatzea, baina ez egitea ere pena da. 1.500 lagun inguru elkartzen dira herriko plazan herri bazkarirako. Urtetik urtera, gainera, gero eta jende gehiagok ematen du izena bazkaltzeko. Egunen batean erabakiren bat hartu beharko da, laster plazan sartzerik ez dugu izango eta.

Zuretzat zer dira andramaixek?

Niretzat festa handiak dira andramaixek. Paella egiten jarduten dut, baina udal korporazioari elizara laguntzen dion mazeroetako bat ere banaiz. Mazero hasi nintzela zortzi urte izango dira.

Andramaixetan bakarrik ez, beste hainbat arlotan ere parte hartzen duzu.

Sanandresetan ere gustura ibiltzen naiz laguntzen; kasu horretan, txosnetan-eta lagundu izan dut. Laguntzeko kontu horretan gustura ibiltzen naiz: Pelotai Euneko bazkarian ere neu aritu nintzen paella prestatzen; ibilgailu klasikoen inguruko ekintzetan ere laguntzen dut; Azkoitia-Azpeitia maratoi erdian; Erregeen kabalkadan, eta Ostiral Santuko prozesioan santua eraman izan dut. Zerbaitetarako esaten didatenean, han joaten naiz ni.

Urte askoan jarraitzeko asmoa al duzu borondatezko lan horietan?

Ahal dudan bitartean laguntzen jarraitzeko asmoa dut, bai. 

Zein da paellari arreta gehien eskaini behar zaion momentua?

Amaiera samarrean esango nuke, azken hogei minutuetan edo. Adi egon behar izaten dugu arroza ez dadin itsatsi, eta ez dadin lehortu. Horretarako, amaiera aldera sua itzaldu egiten dugu.

Paella bigarren aldiz eskean joaten direnak ere badira, ezta?

Bai, asko etortzen zaizkigu arroza berriz jan al dezaketen galdetuz. Paella prestatzen dugunontzat gordetzen dugu kantitate bat, gainontzekoa bukatu arte banatzen dugu.

Bestela aritzen al zara sukaldean?

Bai, gustatzen zait sukaldean egitea. Etxean ere paella egiteko niri eskatzen didate askotan. Sukaldean ondo moldatzen naizela esango nuke.

Zein dituzu sukaldean behar beharrezkoak dituzun gauzak?

Genero eta osagai onak izatea da garrantzitsuena. Halere, sukalderako elementu bat aipatu beharko banu, zartagina hautatuko nuke.

Lau osagai aukeratuta zer plater prestatuko zenuke?

Entsalada epela asko gustatzen zait. Ganbak, letxuga, tomatea eta patata egosia hautatuko nituzke plater hori prestatzeko.

Ba al daukazu atzerriko gustuko jatekorik?

Ez, nahiago dut hemengo jatekoa: 0 kilometrokoa.

Osagaiak (paellera bakoitzeko, 200 lagunentzat)

  • 3 litro olio.
  • 18 kilo arroz.
  • 2 kilo piper.
  • 2 kilo tipula.
  • 2 kilo ilar.
  • 5 kilo txorizo.
  • 5 kilo haragi.
  • 5 kilo txerri-sahieski.
  • 12 kilo oilasko.
  • Ura.
  • Gatza.

Prestaketa

Behin materiala bildutakoan, eta mahaiak eta suak jarritakoan, paellarentzako ontzia sutan jartzen dugu. Olioa botatzen diogu gero, eta su altuan berotzen dugu. Berotzen denean, txorizoa, haragia, txerri sahieskia eta oilaskoa nahasten ditugu, eta sutan edukitzen ditugu gorritu arte.

Paellari gehitzeko salda ere egiten dugu. Kontzejupeko iturritik hartzen dugu ura, eta urari kolorea eta zaporea emateko osagaiak gehitzen dizkiogu. Salda paellaren ontzira gehitu aurretik, ordea, tipula eta ilarrak botatzen ditugu ontzira, eta guztia nahasten dugu. Ondoren, arroza gehitzen diogu, eta itsatsi ez dadin nahastu egiten dugu egurrezko goilararekin. Behin hori eginda, salda botatzen diogu, paellaren ontzi barruko osagai guztiak estali arte. Garrantzitsua da ura botatakoan ere goilararekin guztia nahastea. Salda botatakoan, suaren indarra erdira jaisten dugu, eta denbora batez geldi edukitzen dugu. Gatz pittin bat ere gehitzen diogu, baita piperra ere. Paella egin samartuta dagoela ikusten dugunean, ontzia estali egiten dugu, jendea etorri eta banatzen hasi arte.

On egin!

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide