Iban Larrañaga erremontista azkoitiarra Galarretaren 50. Urteurrenaren Txapelketako finalaurrekora sailkatu da. Atzo, zapatua, 35 eta 32 irabazi zuen Ansa II.arekin batera Urriza eta Zubiriren aurka Hernaniko (Gipuzkoa) Galarreta pilotalekuan.
Larrañagak eta Ansa II.ak 20 tanto nahikoa zituzten finalerdietara sailkatzeko, eta aise lortu zituzten. 35 tanto egin eta partida irabazita, halere, zuzenean finalera sailkatzeko aukerak ere bazituzten. Hori jakiteko, jaialdiko bigarren partidaren emaitzaren zain egon behar izan zuen azkoitiarrak.
Juaneneak eta Endikak 29 tanto ez egitea behar zuten Larrañagak eta bere bikoteak. 34 tanto egin zituzten horiek Goikoetxea V.ak eta Barrenetxea IV.ak osatutako bikotearen aurka galdu zuten partidan. Ondorioz, Larrañagak eta Ansa II.ak atzoko arerio berdinen aurka —Urriza eta Zubiri— jokatu beharko dute finalerdia, datorren zapatuan, Galarretan. Finala, berriz, uztailaren 18an jokatuko dute. ETB1ek zuzenean eskainiko ditu bai finalerdiea eta bai finala.