Eskualdeko gainontzeko herrietan ez da aldatu COVID-19 gaitzaz kutsatutako pertsonen kopurua: 47 kasu baieztatu dituzte Zumaian, hamasei Orion, hamalau Azkoitian, 11 Azpeitian, lau Zestoan, hiruna Aian eta Getarian, eta bi Aizarnazabalen.
Eusko Jaurlaritzaren datuek kopuru horiek zehaztu dituzte, baina kontuan hartu behar da koronabirusaren pandemia hasi zenetik sendatu edo zendu diren bizilagunak ere badirela. Beraz, ezin da jakin ziurtasun osoz zenbat pertsona dauden gaur egun COVID-19 gaitzaz kutsatuta.
Lurraldekako datuak
Osakidetzak jakinarazi duenez, atzo 4.339 PCR proba eta 3.050 test azkar egin zituzten –inoizko kopururik handiena–, eta 344 kasu berri atzeman dituzte Araban, Bizkaian eta Gipuzkoan. Hiru lurralde horietan, 26 pertsona hil ziren atzo, eta 323 lagun osatu ziren. Guztira, 1.193 pertsona hil eta 8.459 sendatu dira krisia hasi zenetik.
Nafarroan berriz, 117 kasu berri atzeman dituzte azken orduetan. Atzo, inoiz baino PCR proba gehiago egin zituzten lurralde horretan: 1.357. Guztira, 5.180 koronabirus kasu aurkitu dituzte kontaketa hasi zutenetik, eta 417 lagun hil dira gaitzaren ondorioz; horietako zortzi, azken orduetan. Guztira, 1.552 lagun sendatu dira Nafarroan.