Alarma dekretua apirilaren 26ra arte luzatu du Espainiako Kongresuak

Maxixatzen.eus 2020ko api. 10a, 10:10
Pedro Sanchez. (Argazkia: PSOE)

Alarma egoera eta, ondorioz, itxialdia, apirilaren 26ra arte luzatzea onartu zuen atzo, osteguna, Espainiako Kongresuak. Pedro Sanchez presidenteak beste luzapen bat eskatzea aurreikusten duela ere adierazi zuen.

Alarma egoera apirilaren 26ra arte luzatuko zuela adierazi zuen orain astebete Pedro Sanchez Espainiako Gobernuko presidenteak. Hala ere, luzapen hori indarrean sartzeko Kongresuaren oniritzia behar zuen, eta atzo egindako saioan jaso zuen. Gobernua osatzen duten PSOEk eta Unidas Podemosek aldeko botoa eman zuten, baita PPk, Ciudadanosek, EAJk, Mas Paisek, Compromisek, CCk, UPNk, Foro Asturiasek, PRCk eta Teruel Existek; EH Bildu, ERC, Junts per Catalunya eta BNG abstenitu egin ziren; eta VOXek eta CUPek aurka bozkatu zuten. Itxialdia, printzipioz, apirilaren 26ra arte luzatuko bada ere, Sanchezek ohartarazi zuen hamabost egun barru alarma dekretua berriro luzatu beharko duela pandemiari aurre egiteko.

Moncloako Itun berria egiteko bilera ere deitu zuen Sanchezek atzoko saioan. Alderdi politikoak, sindikatuak, enpresarien patronala eta autonomia erkidegotako presidenteak deitu ditu, besteak beste, bilera horretan parte hartzera. Koronabirusaren krisialdiaren ondoren Espainia “berreraikitzea” du helburu itun berri horrek. Euskal alderdi nagusiek parte hartuko duten edo ez azaldu zuten: EAJk bileran parte hartzeko prest dagoela esan zuen eta EH Bilduk joango ez zela aurreratu zuen.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide