Goierri eta Urola Garaiko Osakidetzaren Erakunde Sanitario Integratuak (ESI) zalantzak argitzeko eta herritarrei erantzuteko zerbitzua jarri zuen martxan atzo, larunbata. Osakidetzaren tokian tokiko zerbitzuak berrantolatzeko hartutako neurrietako bat izan da hartu dutena, eta aurrerantzean, osasun zerbitzuekin harremanetan jarri nahi duen orok bere herriko anbulatoriora deitu beharko du lehendabizi. Telefonogune batera bideratuko dute herritarra, eta bakoitzari nola jokatu azalduko diote zerbitzuko langileek.
Hori dela eta, deia egingo duten herritarrei osasun txartela eskura izatea gomendatu die Osakidetzak, datuak eskatuko baitizkiote. Egunero izango da martxan telefono zerbitzua, astegunetan nahiz jaiegunetan, eta Azkoitiko bizilagunek anbulatorioko 943-00 76 10 telefono zenbakira deitu beharko dute. Neurria martxan izango da alarma egoera bertan behera utzi bitartean.