Emakumeen Nazioarteko Egunaren harira, hainbat ekitaldi izango da egunotan Azkoitian, eta herriko ikastetxeek ere emakumeen aldeko aldarriarekin bat egin dute gaur, ostirala, Kontzejupean. Izan ere, Bizilore Eskola Aktiboko, Xabier Munibe Ikastolako, Floreaga Ikastetxeko, Azkoitia BHIko eta Izarraitz Lanbide Heziketako ikasleek Martxoaren 8ko pankartak egin dituzte indarkeria matxistaren aurkako aldarriekin. Pankarta horiek udaletxeko balkoian zintzilikatu dituzte.
Mertxe Zubillaga Azkoitiko Udaleko berdintasun zinegotziak eskerrak eman dizkie ikastetxeetako ordezkariei Martxoaren 8ko aldarriarekin bat egiteagatik, eta urte osoan zehar eskoletan berdintasuna lantzen jarraitzeko eskatu die gazteei.
Bestalde, arratsaldean Artxamendi topalekuko gazteek mural bat margotuko dute, Azkoitia BHI zentroaren parean, saihesbide azpiko horman. Horrez gain, datozen egunetarako beste hainbat ekintza antolatu dute herriko eragileek.
Hona hemen egitaraua:
Martxoak 7, larunbata. 17:00etan, Artxamendi Topalekuan, Girlhood, Banda de Chicas filma eskainiko dute.
Martxoak 8, igandea. Sostenipe talde feministak antolatuta.
- 10:00. Juntadizoa eta kafe tertulia.
- 12:00. Kazerolada.
- 12:30. Elkarretaratzea.
- 13:30. Bazkari autogestionatua.
- 16:15. Donostiako manifestaziora autobusa, liburutegi aurretik irtenda. Autobuserako izena emateko: zakela, Etxe Aitz eta Galipan tabernetan edota sostenipe@hotmail.com helbidera idatzita.
- 18:00. Donostian, manifestazioa.
Martxoak 9, astelehena. 18:00etan hasita, Batukada Feministaren kalejira, Elkargunetik herriko plazara. Ondoren, Erniarraitz bertsozale elkarteko emakume bertsolariek bertso saioa eskainiko dute, plazan.