Kaleak garbitzen ibili dira herriko ikastetxeetako ikasleak

Herriko ikastetxeetako 160 ikasle inguru kaleak garbitzen ibili dira 'Azkoitti garbixe, etxie bezelaxe' kanpainaren barruan. Besteak beste, Oteiza frontoiak, Intsausti jauregia eta ikastetxeetako atariak garbitu dituzte gaztetxoek.

Joan zen astean jarri zuen martxan Azkoitiko Udalak Azkoitti garbixe, etxie bezelaxe kanpaina, eta gaur, astelehena, herriko ikastetxeetako haur eta gaztetxoak kaleak garbitzen ibili dira. Eskolako Agenda 21 programaren bueltan jaso zuen Udalak kale garbiketaren inguruko kanpaina egiteko proposamena; Floreaga Ikastetxeak, Azkoitia BHIk eta Izarraitz Lanbide Heziketak parte hartzen dute Agenda 21 programan, baina Xabier Munibe Ikastola eta Bizilore Eskola Aktiboa ere kanpainara batu dira.

Floreaga Ikastetxeko eta Xabier Munibe Ikastolako ikasleek beren ikastetxeetako atariak garbitu dituzte aurrena, eta ondoren, Oteiza frontoietan, Intsausti jauregiaren inguruan, eta herriko plazatik Balda plazara arteko zatian ibili dira zaborra jasotzen. Horren ostean, ikasleek plazan bildu dute jasotako zabor guztia, eta materialaren arabera sailkatu dute. Amaitzeko, garbiketan parte hartu duten guztiek argazki erraldoia atera dute. 

(Argazkiak: Maxixatzen eta Azkoitiko Udala)

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide