Gaztedi finala jokatuko dute igandean Gurean

Igande honetan, hilak 16, #izanezberdin Gaztedi Xake Txapelketako finala jokatuko dute Anaitasunako eta beste hainbat taldetako kideek Gurea pilotalekuan.

Guztira 32 taldek parte hartuko dute, lauko taldeetan banatuta. Lehiakideak bi kategoriatan banatuko dira: handiak eta txikiak. Eta talde bakoitza lau jokalarik eta bi ordezkok osatuko dute. Aurten, gainera, parte hartzaile kopurua handituko dute eta jokoaren sistema aldatuko dute: Kopa sistemaren ordez, 5 txandako suitzar erara. Horrela, aukera gehiago izango dute lehiakideek amaierara arte borrokatzeko.

Cesar Montolio izango da epaile nagusia, Miriam Muñoz, Christian Sánchez, Carlos Sánchez, Imanol Larrañagak eta Anaitasuna Xake Taldeko hainbat kidek lagunduta. Txapelketa antolatzen ari dira Kutxa Fundazioa, Gipuzkoako Xake Federazioa, Anaitasuna Kakute Xake Taldea, Azkoitiko Udala eta Graphic’s.

Jose Luis Fernandez Anaitasuna Kakute taldeko lehendakariak kontatu du «dibertsitatea eta giro ona» erakusten dituela txapelketa horrek: «Guztiek irabazi nahi dute txapelketa, baina antolatzaileak eta monitoreak aurkariarekiko errespetua, talde lana, ikasten jarraitzeko gogoa eta gozamena transmititzen ahalegintzen dira xakelari gazteei».

Gipuzkoako bederatzi gunetan antolatu dituzte txapelketako kanporaketak, eta guztira 50 taldek parte hartuko dute. Finalean 32 talde ariko dira, iaz baino zortzi gehiago, eta horietako asko inguruko hainbat herrietatik etorriko dira: Irun, Hondarribi, Donostia, Hernani, Zarautz, Zumaia, Azpeitia, Bergara, Beasain, Lazkao eta Arrasate.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide