Udala osatzeko ordua

Azkoitiko Udalerako alkategaiak.

Gaur, maiatzak 26, udal, foru eta Europako hauteskundeak ospatuko dira. Gurera, Azkoitira, etorrita, bost hautagai eta horien zerrenden artean egin beharko dute hautua azkoitiarrek: EAJ, EH Bildu, Azkoitia Bai, PSE-EE eta PP.

09:00etan, ireki berri dituzte hauteslekuak. Xabier Munibe Ikastolan, Torre Zuri erakustokian, Elkargunean eta Aizkibel liburutegian izango dira Azkoitiko hauteslekuak irekita, 20:00etara arte. Egun Udalean ordezkaritza duten lau udal taldek aurkeztu dituzte hautagaitzak: EAJ, EH Bildu, Azkoitia Bai eta PSE-EE. Ordezkaritza ez duen alderdi batek ere aurkeztu du bere hautagaitza: PP.

Javier Zubizarreta (EAJ), Ainara Goenaga (EH Bildu), Jose Joakin Etxaniz (Azkoitia Bai), Janire Igoa (PSE-EE) eta Jose Antonio Bermudez (PP) dira Azkoitiko Udalerako alkategaiak. Horietako bat izango da 2019-2023 legealdiko alkatea, horien eta euren zerrendakideen artean aukeratu beharko dute azkoitiarrek.

10:15etik 10:30era bitartean Xabier Munibe Ikastolan emango du botoa Javier Zubizarreta EAJren alkategaiak. Bozkatzen bigarrena Ainara Goenaga EH Bilduren alkategaia izango da. 11:00etan,Torre Zurin emango du botoa koalizio abertzalearen alkategaiak. Jose Joakin Etxaniz Azkoitia Baiko alkategaiak 11:15ean emango du botoa, horrek ere Torre Zurin. Janire Igoa PSE-EEko alkategaiak ere Torre Zurin emango du botoa, 11:30ean.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide