Azkoitia Lagunkoiak emozioei buruzko ikastaroa antolatu du

Azkoitia Lagunkoiak, Udalarekin eta Plaza Ondo Jubilatu Elkartearekin elkarlanean, emozioak identifikatzeko eta ulertzeko ikastaroa antolatu du. Lau saiotan banatuta, sei orduko iraupena izango du tailerrak.

SENTITU tailerraren xedeetako bat da «gure indargune psikologikoak ezagutzea, ongi sentiarazten gaituzten erlazioak zaintzearen garrantziaz jabetzea edota bakardadearen alderdi positiboak lantzea».

Psikologian doktorea eta Matia Fundazioko ikertzailea den Nerea Galdonak zuzenduko ditu saioak. Ikastaroa maiatzaren 29an eta ekainaren 5ean, 12an eta 19an izango da, 10:30etik 12:00etara. Plaza Ondo Jubilatu Elkartearen egoitzan izango dira saioak (Kultur Etxean, Herriko plazan).

Ikastaroa doakoa da eta parte hartu nahi duten pertsonek izena eman dezakete udaletxeko Herritarren Arreta Zerbitzuan edo 943 08 00 80 telefonora deituta.

Aurtengoa emozioen inguruan Azkoitia Lagunkoiak antolatzen duen bigarren ikastaroa da. Iaz Nola mantendu gure emozioak modu inteligentean izenburupean beste ikastaro bat eskaini zen. Orduan emozioak, sinesmenak eta balioak ezagutzeko estrategiak landu ziren eta emozioek gure osasunean eta harremanetan duten eragina aztertu zen.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide