maxixatzen.eus

Jolaserako parke estalia

  Iritzia  Azkoitia

M. Karmen Elorzak parke estaliaren inguruko gutuna bidali dio Maxixatzeni. Uste du Gamundiñeko berdegunea ez dela egokia jolastokia eraikitzeko, besteak beste, «herria zatartu besterik ez lukeelako egingo». Jarraian gutuna irakurgai:

 

«Herritar bezala eta nire herria asko maite dudalako egon ezina sortzen dit parke estaliaren kokapenari buruz udaletxeko 'batzuk' hartutako erabakiak. Gamundiñeko Etxe inguruan, lehen parke irekia dagoen ondoan, egingo dela esan baitute.

Ondoren aipatuko ditudan arrazoi desberdinengatik ez dut leku hori inolaz ere egokia ikusten:

1. ESTETIKA

Gaur egun dagoen bezala txoko hori herriko politenetakoa da, librea, alaia, etxe eta zuhaitz ederrekin. Herri erdigunean dagoen leku bakarrenetakoa belar zatitxoekin, orokorrean dena harri grisez estalita baitago herri osoa.

Horren aurrean hau diot: Berdegunea, natura zati bat, kendu eraikin estali bat egiteko? Honek ingurua edertuko duelakoan? Herria zatartu beharrean, gero eta ederragoa egitea izan beharko luke udalaren helburua, ezta?

2. LOGIKA ETA ETIKA

Erabaki hori hartzeko udaletxeko horiek eman duten arrazoi bat erdigunean kokatuta egotea izan da. Nola esan daiteke hori herriko adineko pertsonentzako EGOITZA herritik kanpo dagoenean?

Ibiltzeko eta mugitzeko zailtasuna duten pertsonak herriko bizitzatik kanpo BIZI dira bere etxebizitza erdigunetik urruti dagoelako, eta herrira gerturatu nahi badute garraioa hartu beharrean aurkitzen dira.

Eta, sasoi onenean dauden pertsonentzat, denbora-pasa ibiltzeko, herriko erdigunea leku egokiena ikusten dute udaletxeko gure ordezkari diren horiek? Ez al dago beste lekurik? Bi pauso gehiago emateko zailtasunak ote dituzte haur, guraso gazte eta sasoiko aittitte-amamek?

3. DATUEN FALTA

Nire iritzi horiek eta proposamenak udaletxean agertu ondoren, erantzun bezala jaso dut herritarren gehiengoaren nahia betetzen saiatu direla. Hori horrela izango balitz arrazoi hori onartuko nuke, hori baita 'DEMOKRAZIA'. Baina, horren aurrean nire galdera da: ZERTAN oinarritzen dira hori esateko? Non dago galdeketa hori? Non daude datuak?

Badirudi ni beste herri batean bizi naizela. Gai horretaz hitz egin dudan pertsonetatik (asko eta adin desberdinetakoak) inori ere ez diot entzun Gamundiñeko leku hori egokiena denik. Erabat pentsatzen dute eraikin berri horrek, munduko politena izan arren, leku horretan egiteak herria zatartu besterik ez lukeela egingo.

Galdeketa hori herrian egina badago bere emaitzak datu guztiekin publiko egin beharko lirateke jendearen mesfidantza eta zurrumurruak ekiditeko. Emaitza horiek azaltzen badute Gamundiñeko leku hori herritarren gehiengoak erabakitakoa dela, ez dago beste ezer esaterik. Baina, hori bai, argi eta garbi azaldu datuak herriaren aurrean. Eskertuko nuke.

Herria denona da eta zain dezagun. Zer deritzozue»?

Erantzunak

Erantzuna | #1

Parke estali berri bat eraiki beharrean herriko auzo ezberdinetan ditugunei aterpea egitea da nire proposamena.
Hainbat parke estali izango genituzke herritarrok etxe ondoan, norbere auzoan, eta ez egiterako txiki geldituko den estali bakarra, polemikaz betea, herri erdian.

Erantzuna | #2

Askoz ere egokiagoa iruditzen zait aurreko legealdian herritarren parte hartze prozesu bidez erabaki zen kokapena.

Erantzuna | #3

Aupa danori!
Udal taldeak aurkeztu zuenean proposamena, gutako batek erantzun zuen partaidetzaren gaia nola zegoen galdezka (inork ez zion erantzun, bestalde). Beno, gauza bat esateko badet hemen. Udal talde hau sartu zenetik garbi utzi zuen bere egitekoa lau urtetarako programan zegoela idatzirik eta hori egitera lotuko zirela 100%. Bere programan parke estalia dago eta nahi duten bezala egiteko aukera legala dute. Bere ustetan gainera, hauteskundeetan irabazitako botereak beraien etika eta estetika ikuspegia ezartzeko eskubidea ematen die.
Horrelako ikuspegia dute politikaz eta horrelako ikuspegiarekin irabazi zuten Azkoitian. Horrelako egiteko moduekin egin zituzten "Elkargunea", igerilekua eta saskiko kantxa batere ikutu gabe eta merkatuko prezio doblean. Horrela erabaki zuten kanpoko pistinak "txirinbolo" forma behar zuela izan eta horrek erantzuten ziela Azkoitiarren beharrei.
Beraz, ez da sorpresa bat eta lasai egon zaitezkete, zuen parke estalia izango duzue, baina Xantuek erabakiko du nun.
Horrelakoekin zerbait aldatu behar bada, herri ekimenetik abiatuta izan beharko da (igerilekuaren gaia duzue herrian adibide ona). Ea ulertzen duzuen behingoz, hauek ez dute herri partaidetzan sinisten eta ez dizuete inoiz galdetuko ez bazarete mobilizatzen, horrela ulertzen dute politika eta demokrazia (galdetu bestela zuen herriko oposizioan dauden zinegotziei ea beraien ekarpenen bat jaso ote duten legegintzaldi osoan. Ez dakit ezer, baina seguru bat bera ere ez dietela onartu).
Ta jun preparatzen, hurrengo lau urteetarako ere Jainkoa eta Lege zaharraz gestionatuak izango zarete Hitza-n irakurri ahal izan dudanez (medio horretan urte hauetan egin duen elkarrizketa bakarrenetakoan, bestalde)

Erantzuna | #4

Parke estalia dela eta...
Nire iritzia azaldu nahi nuke:
- Ez zait iruditzen toki egokiena denik aukeratu den hori.
- Alde batetik, inguruko etxeei traba egin dezake, berde gune bat galduko genuke eta inguru horrek duen xarma galduko luke.
- Bestaldetik Trenbidearen Zumardi ingurua askoz egokiagoa ikusten det. Toki zabalagoa da eta herritarrok asko ez duguna erabiltzen, aurreko etxeei ez lioke kalterik egingo eta egune batean handitu nahi izanez gero, arazorik ez litzake izango.
- Beste arrazoi bat da, Maxixatzen egiten ari den inkestan, herritar gehienak ez dutela gustuko kokapen hori.
- Herriko beste alderdi politikoen iritzirik ez duzute eskatu ere egin.
- Eta bukatzeko, garrantzitsuena dena: aurreko legealdian herritarren parte hartze prozesu bidez erabaki bazen parke estalia egitea eta horren kokapena zein izango zen, ez daukazute irterarik: zuen burua DEMOKRATAZ baldin badaukazute, herritarren erabakia errespetatu behar duzute.

Erantzuna | #5

Atez ateko postetxuek izugarrizko kaltie ette omen zeben kalien eta oñ parapeto haundi hori jarriber aldebe herri erdi erdixen umik jolasin ibiltzeko?

Udaletxe hortakuk aurten eztebe bela nere partetik eregaloik jasoko!!

Erantzuna | #6

Zein izen da hor jartzie okurriu zakon iluminaue??

Txakur gixajuk, oin kaka ittea noaino jum ber debe??? PLAZAÑO???

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa