Aitorpen horrek gure bailara europar kultura mapa turistikoan kokatzen du.
Ignaziotar Lurraldea hiru bailaretako garapen agentziek elkarlanean garatutako egitasmoa da. Iraurgi Berritzenekin batera, Uggasa eta Debagoeineko Mankomunitatea 1997tik ari dira lanean eta etengabeko bilakaera izan du proiektuak. Hain justu, bailaren arteko lankidetza modu positiboan baloratu da sarietan, jasangarritasunarekiko eta kultur ondarearen kontserbazioarekiko erakusten duen konpromisoa bezala.
Proiektuak Loiolako San Inazioren erromesaldia ekartzen du gogora Arantzazutik pasatuz. Ignaziotar Lurraldeak hainbat toki hartzen ditu barne, esanguratsuenak hiru tenplu hauek dira: Loiolako Santutegia, Antiguako ermita eta Arantzazuko Santutegia.
Tartean, Azkoitian bisitariek, besteak beste, Balda Dorrea ikusteko aukera dute. Bertan bizi izan zen Marina Likona eta Balda, Loiolako San Inazioren ama, alegia. Horregatik eraiki zen 1923an santuaren omenezko kapera.
Turismo Kulturala
EDEN sarien VIII edizioa Turismo Kulturala lelopean garatu da. Sarien helburua da susperraldian dauden eta turismo jasangarriari lotuta dauden tokiak ezagutaraztea. Egun, 27 herrialdetako 350 helmuga daude EDEN sarearen barruan.
Ignaziotar Lurraldea proiektuaren sari emate ekitaldia martxoaren 22an izango da Bruselan, European Award Ceremony sarien baitan.