Organikoa biltzeko edukiontzia aldatu egin dute: lehengoak atzeko kargakoak ziren, eta zaborra biltzeko gaitasun txikia zuten; oraingoak, berriz, handiagoak dira, 2.200 litrokoak, eta zaborra albo batetik jasoko dute. Azpitik begiratuta, lau edukiontzi gris kolorekoak dira, eta bakoitzaren tapak izango dira bereizgarriak: marroia, organikoarena; horia, ontzi arinena; urdina, papera eta kartoiarena, eta grisa, errefusarena. Pixoihalak ere edukiontzi grisera bota beharko dira. Bestalde, esan dute beiraren edukiontzia berezia dela, sistema berezia duelako, eta gainerako edukiontzietan biltzen den zaborra albo batetik jasoko dutela aurrerantzean.
Kontzientziazio kanpaina
Edukiontzien sistema behin betiko aldatu dutenez, bide batez, kontzientziazio kanpaina ere abiatuko du Udalak. Etxe guztietara triptiko bat banatuko dute; bertan, zaborra zein edukiontzitara bota behar den azalduko da, eta zer ez den bota behar ere bai.
Kaxa erraldoiak 68 gunetan
Herriko zenbait gunetan egurrezko kaxa erraldoi batzuk jarri dituzte: hiru kaxa ontzi arinei dagozkienak izango dira, eta laugarrena beiraz, paperaz eta organikoaz osatutako produktuekin beteta egongo da.
Bi astez behin lekuz aldatzen joango dira kaxa horiek, abendura bitartean, herriko puntu guztietara iristeko. Guztira, 68 lekutan egongo dira. Bestalde, herritarrei kaxak errespetatzeko eskatu diete, azken batean "herritarrek zaborra ondo bereizten ikasteko" izango delako eta modu horretan "Azkoitian gehiago birziklatuko delako eta zaborrak sortzen dituen gastuak murriztuko direlako". "Jende gutxik pikutara bidaltzen du jende askoren lana", esan du Miguel Angel Bastida Lurralde Antolakuntzako, Ingurumeneko, Landa Garapeneko eta Obra eta Zerbitzuetako Saileko zinegotziak.
