Azaroaren 25eko ekintzarekin indarkeria matxista “gure artean oraindik sustraituta” dagoela salatu nahi dute. “Egiturazko ezberdintasun eta bereizkeriak eta botere banaketa desorekatua dira indarkeria matxistaren oinarri. Oraindik ere, gure jendarte honetan, emakume izateagatik soilik, bizi baldintza okerragoak, indarkeria sinbolikoa, fisikoa eta sexuala, soldata txikiagoak, lan zama handiagoak, eta abar jasan behar izaten dituzte emakumeek”.
Mikel Alberdi Urola ikastolako ordezkariak esan du “pauso txikiak ematea” bakoitzaren esku dagoela “eskoletatik hasi eta beste edozein alorretan”. Gaineratu du elkarrekin "ekimen asko garatzeko aukera" dutela. “Indarkeriak jazoera dramatikoak ekartzen ditu, baina guk ikastetxeetan eta jendartean tratu onetan oinarrituriko gizartea nahi dugu. Tratu txarrez aritzen gara, baina uste dugu tratu onez hitz egiten hasteko ordua dela, bizikidetzaren oinarria baita”.
Hezkidetza proiektuaren baitan, Udalak eta ikastetxeek elkarlanean urteak daramatzate indarkeria matxistaren aurka lanean, ikasleak berdintasunean hezten ahaleginduz. Hezkidetza Foroa ere osatuta dago elkarlanean aritzeko: Zestoako, Azpeitiko eta Azkoitiko udalen eta ikastetxeen topagunea da, eta hainbat ekimen jarri ditu martxan emakumeen aurkako indarkeriari aurre egiteko.
Udalak eta Azkoitiko ikastetxe guztiek –Xabier Munibe ikastola, Floreaga Ikastetxea eta Urola Ikastola- emakumeen aurkako indarkeria salatzeko, azaroaren 25erako antolatu duten ekimenean parte hartzera deitu dituzte herritarrak.
