Bergarako Kilometrotara joateko autobusak egongo dira Azkoititik

Maxixatzen.eus 2016ko ira. 27a, 15:46

Igande honetan, urriaren 2an, Kilometroak 2016 jaia ospatuko dute Bergaran, eta hori dela-eta autobusen zerbitzu berezia ezarri dute Azkoititik Bergarara joateko. Joan etorriko txartela 6 euro izango da, eta honako ordu hauetan irtengo dira autobusak Julio Urkixo etorbideko autobus geltokitik: 09:20an, 11:15ean eta 15:30ean.

 

Bergaratik Azkoitira itzultzeko, berriz, honako ordu hauetan irtengo dira autobusak Bergaratik: 14:00etan, 18:00etan eta 20:00etan.

Autobus txartelen erreserbak Loiola Bidaiaken bulegoan (Ibaiondo kalea, 9 zbk) edo Arroabeko Sansinenea Erreka industrialdeko Alekar gasolindegian egin daitezke. Informazio gehiago eskuratu nahi duenak deitu telefono honetara: 943 852 212.

Honako hau da aurtengo Kilometrotako "Demasa" bideoklipa.

Bideoklipa Emon taldeak konposatua da, eta Maddi Iñarrarena da letra. Hau da Demasa abestiaren letra:

Ozen, argi, beldur gabe esan munduari:
nor zaren, zein garen,
euskaraz noraino iritsi ahal den,
gu gara demasak!

Metroz metro egiten
dira kilometroak,
alez ale hondartzak
hitzez hitz hizkuntzak (e)ta
guztion ahaleginez
ikastola demasak!

Ezkutuan ikasten,
ezkutuan aranzaditarrak ernaltzen
euskaraz munduan libre bizitzen
demasak garela, demasak sentitzen
txikiak gara baina xumeak inondik
agresio guztien gainetik zutik
zerbait sortuaz hemendik
kilometroka gora!

Ozen, argi, beldur gabe esan munduari:
nor zaren, zein garen,
euskaraz noraino iritsi ahal den,
gu gara demasak!

Amets zaharrak berrituz
unera egokituz
(e)ta geroa marraztuz.

Haien ametsak gure errealitate
ereindako haziek fruitua dakarte
hautsiko ez den euskararen kate
kilometroz kilometro infinitura arte!

Herria da hizkuntzaren habia
ikastola handi hasi den txoria
euskara mendeetako testigu bizia.

Ozen, argi, beldur gabe esan munduari:
nor zaren, zein garen,
euskaraz noraino iritsi ahal den,
gu gara demasak!

Aranzadi, beldur gabe esan munduari:
nor zaren zein garen,
euskaraz noraino iritsi ahal den,
gu gara demasak!

 

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide