Azkoitia eta Azpeitiko merkatarien produktuak erosteko aukera eskaintzen du Hemenbuy! plataformak, urteko 365 egunetan. Denda txikietan erosteko, kontsumitzaleei zerbitzu "zabalagoa eta erosoagoa" eskaintzen zaiela azaldu dute arduradunek. Milaka bisitari dira webgunea bisitatu dutenak eta orain arte salerosketa "ugari" kudeatu dituzte.
Bertako merkataritza bultzatzeko beste bide bat izan da Hemenbuy!, "dendariak eta herria bizirik mantentzeko beste pausoetako bat". Plataforman jada 43 dendari daude aktiboki lanean, eta 4.000 produktu inguru dituzte salmentan. Hainbat sektoretako produktuak dituzte salgai: moda, etxea, Elikadura, osasuna & edertasuna edo aisia, besteak beste.
Bestalde, online eta offline munduak batzeko balio izan du, online erositako produktuak dendan ere jaso daitezkelako.
Aurreneko urte honetako gure helburu nagusia plataforma berria ezagutaraztea zen. Horretarako, bloga, sare sozialak ekitaldiak eta promozioak sortu eta aktiboki kudeatu ditugu. Hemendik aurrera, gure salmentak eta audientzia igotzea izango da hurrengo helburua. "Oso pozik gaude aurreneko urtean izandako erantzunarekin", azpimarratu dute plataformaren arduradunek.