Urrategi Alberdi Azkoitiko egungo alkatea izango da EH Bilduren zerrendaburua maiatzeko Udal Hauteskundeetarako. Gaur eguerdian aurkeztu du ezker abertzaleko koalizioak hautagaitza, Elkarguneko Oteiza aretoan egin duen ekitaldian.
Hamar emakumek eta hamar gizonezkok osatutako taldea aurkeztu dute; legealdi honetako Udal Gobernuan lanean ari diren hiru kidek (Urrategi Alberdi alkateak eta Jesus Mari Oteiza eta Gaizka Larrañaga zinegotziek) eta 17 hautagai berrik osatzen dute zerrenda.
Eneritz Artetxek aurkeztu duen ekitaldian, Ainhoa Beola Gipuzkoako Batzar Nagusietarako EH Bilduren hautagaiak eta Urrategi Alberdi Azkoitiko EH Bilduren zerrendaburuak hartu dute hitza.
"Ilusio berrituarekin", koalizioak Azkoitian hasitako "bidea finkatu, elkarlana sendotu eta bide berriak" jorratzera datozela esan du Alberdik.
"Mundu hobeago batekin egiten dugu amets, herri justuago batekin, herri solidarioago batekin. Inor baztertuko ez duen mundua irudikatzen dugu, aniztasunez aberastutako herria, pertsonen eskubide guzti guztiak errespetatuko dituena, eta gizon zein emakume berdin izango garena. Eta ingurumena zainduko duen mundua", azpimarratu du.
"Airean gelditzen diren ametsetan" baina, ez dutela sinesten, eta horregatik, "azkoitiar guztion elkarlanarekin, pausoak elkarrekin emanaz lan egitera" datorrela adierazi du Alberdik.
Beolak ere ildo beretik hitz egin du, eta azken lau urteotan EH Bilduk Azkoitiko Udalean egindako lana azpimarratu du. Bere hitzetan, "esan ziguten ez ginela gai izango gauzak egiteko, eta ekonomikoki egoera larrian hartutako udala zulotik ateratzeko gai izan zarete".
Jendetza batu da Elkarguneko Oteiza aretoan, EH Bilduren aurkezpen ekitaldian. Hautagai guztiek eta bertaratu diren herritarrek elkarrekin atera duten argazkiarekin amaitu dute ekitaldia.
Hemen, Azkoitiko EH Bilduren zerrendako hogei hautagaiak:
Urrategi Alberdi Garate
Jesus Mari Oteiza Carrasco
Idoia Uranga Salegi
Jakes Uranga Repulles
Gaizka Larrañaga Uzin
Ainara Goenaga Andueza
Jon Ander Larramendi Salegi
Iraitz Otaño Mujika
Edurne Izagirre Olariaga
Miren Alberdi Urzelai
Galder Gonzalez Bilbatua
Itziar Joaristi Olariaga
Joxe Sarasua Imaz
Iraitz Korta Etxaniz
Ainara Azpiazu Altuna
Kepa Alberdi Egaña
Maria Ostolaza Permisan
Antton Elorza Dierez
Ainhoa Aranbarri Andueza
Oihana Aranbarri Arregi