KOADERNO BERDEKO POSTALAK-20 gure mugak
pauso asko eman beharko ditu umeak
heldutasunera daraman bidean aurrera
eta bidearen bukaerara hurbildu ahala
emozioen jakinduria berezkoa abandonatu egingo du
bideak mugak ditu ertzak bazterrak
bide izango bada eta ez belardi eremu itsaso
eta umeak mugak behar ditu heldu izango bada
heriotza da bizi garenon muga ziur bakarra
jaiotzeak hiltzea zor zioen gure amak
eta zer eskolatan erakusten da hori gaur
bost urte neuzkan aittitte agustinen hilotza ikusi nuenean
baserrian atondutako hil beilan gorpua ikusteak ez dit kalterik eragin
orduan hasiko nintzen jaiotzeak hiltzeari dion zorra ulertzen
gure umeei hilberri den amama erakustea erabaki genuen
etxez kanpoko beilatokian hilotza ikusteak ez die kalterik eragin
orduan hasiko al ziren jaiotzeak hiltzeari dion zorra ulertzen
heriotzaren muga non dagoen jakiteak kokatzen digu bizitza
latitudea altitudea ematen dizkigu geure burua gidatzeko
zerk merezi duen zer baztertu behar dugun erakusten digu heriotzak
pauso asko eman beharko ditu helduak
bere heriotzara daraman bidean aurrera
eta bidearen bukaerara hurbildu ahala
umetako jakinduria beharko du bidea bukatu dela ulertzeko.
Aitor Arruti Rezabal