Jakin ber, jakin berra. Jakingura. "Ik dauken jakin berra bestiei buruz".
Mugikorrak gero eta adimentsuagoak dira, baina konbentzituta nago erabiltzen
ditugunok gero eta lerdoagoak bihurtzen ari garela. Uda honetan WhatsApp bidez
zabaldu diren bi irudi ikusteko aukera izan dut. Batak, gazte azkoitiar batzuek herri
barruan izandako auto istripuaren ondorioak erakusten zituen; auto gidari trakets
batek Julio Urkijo kaleko oinezkoentzako pasabide batean ibilgailua sartzerakoan
sortutako egoera aldrebesa azaltzen zuen besteak. Bata, larria; bestea, parregarria
izan zitekeena. Baina parregura gutxi egunero egiten ditugun akatsak edo izaten
ditugun ezbeharrak denon berriketarako gai bihurtzen direnean, froga grafiko eta
guzti gainera.
Azpeitian ere beste horrenbeste gertatu da azkenaldian. Baten batek Enparan
Dorrearen aurreko pasabidean aparkatu zuen autoa, hiru eskailera maila jaitsita eta
guztiz debekatuta dagoen toki batean. Berehala zabaldu da argazkia eta herriko
komunikabidean ere jaso dute “albistea”. Komentatu didate leihotik salto eginda
orain dela gutxi bere buruaz beste egin zuen gizonaren irudia ere zabaldu zela
mugikorretatik. Bigarren kasu horren larritasuna argi ikusten da, baina, zeinek esan
dezake gaizki aparkatutako autoarena gertaera dibertigarria denik? Eta gidaria
Alzheimerrak jota badago? Eta alkoholizatutako pertsona batek sortutako egoeraz ari
bagara? Pertsona horiek gure familiakoak balira, zer? Argazkia aterako al genuke?
Zabalduko al genuke?
Ez dakit zerk bultzatzen duen pertsona bat horrelako argazkiak ateratzera, ezta
zein interes aurkitzen duen horiek zabaltzen ere. Afizionatu mailako kazetari edo/eta
polizia asko sumatzen ditut inguruan, eta beldurra ematen dit. Ez ote dauzkagu
nahikoa kamera eta zaintza kale eta eraikinetan? Azkoitiarrok hain zaleak garen
zurrumurruen 3.0 bertsioa izan daiteke hau, badakit; funtsean ezer gutxi aldatu
da, forma besterik ez agian. Baina teknologia berriekin balizko kalteak biderkatu
eta mugagabe zabaldu daitezkeela eta ondorioak izugarriak izan daitezkeelakoan
nago. Teknologia horiexek ondo erabilita, aldiz, probetxuzko zerbait egiteko gai izan
gaitezke. Lekukotza zerbaiterako erabili. Ikusi (merezi badu). Filmatu (beharrezkoa
bada). Aldatu (aldatzeko premia duena).
Irene Elorza